რუსეთში ექიმებმა ვერ გადაარჩინეს მორგში „გაცოცხლებული“ ქალი
რუსეთის ფედერაციის ამურის ოლქში, ბელოგორსკის საავადმყოფოს პერსონალი ორი საათის განმავლობაში ცდილობდა რეანიმაციას პენსიონერი ქალისა, რომელმაც სიცოცხლისათვის დამახასიათებული ნიშნების გამოვლინება დაიწყო პროზექტურაში, სადაც ის მიიყვანეს წინა დღით მოწყობილი ოჯახური ქეიფის შემდეგ - სააგენტო „რია ნოვოსტის“ ცნობით ამის შესახებ იუწყება რუსეთის ფედერაციის ჯანდაცვის სამინისტრის საოლქო დეპარტამენტი.
საავადმყოფოს მთავრი ექიმის მიხაილ დანილოვის თქმით, სოფელ ვასილევკაში უგონო მდგომარეობაში მყოფი მოხუცი ქალი იპოვეს მისმა ნათესავებმა, რომლებმაც მომხდარის შესახებ შეატყობინეს პოლიციას.
„ადგილზე მისულმა შს სამინისტროს განყოფილების თანამშრომელმა არ გამოიძახა სასწრაფო დახმარება, როგორც ამას მოითხოვს ინსტრუქცია. პოლიციელმა თვითონ დაადგინა გარდაცვალების ფაქტი, გამოიძახა სარიტუალო სამსახური და „გვამი“ გადაგზავნა მორგში შესაბამისი დოკუმენტების გარეშე“, - განმარტეს რუსეთის ფედარაციის ჯანდაცვის სამინისტროში.
ქალი მორგში 09.40 საათზე „მიიტანეს“, თუმცა ცოტა ხანში მას სიცოცხლის ნიშნები დაეტყო, რის გამოც სანიტარმა დაუყოვნებლივ გამოიძახა სასწრაფო დახმარების სარეანიმაციო ბრიგადა.
„10.00 საათზე პენსიონერი ქალი მიყვანილი იქნა ბელოგორსკის საავადმყოფოს რეანიმაციის განყოფილებაში, სადაც ორი საათის განმავლობაში ექიმები უშედეგოდ ცდილობდნენ მის გადარჩენას. 12.00 საათისათვის ის გარდაიცვალა წინასწარი დასკვნით, გადაციებისა და ინტოქსიკაციის შედეგად“, - ასეთი განმარტება გააკეთა რუსეთის ფედერაციის ჯანდაცვის სამინისტროს წარმომდგენელმა.
„რია ნოვოსტის“ ცნობით, მომხდარ ფაქტით დაინტერესდნენ ამურის ოლქის შს სამინისტროს სამმართველო და საგამოძიებო კომიტეტი.