აშშ-ში უშედეგოდ დასრულდა "შატდაუნის" დასრულების კიდევ ერთი მცდელობა
აშშ-ის პრეზიდენტი დონალდ ტრამპი და კონგრესში დემოკრატების ლიდერები კვლავ ვერ შეთანხმდნენ ფედერალური მთავრობის იძულებით შეწყვეტილი მუშაობის განახლებაზე. 9 იანვარს, კონგრესის წარმომადგენელთა პალატის დემოკრატმა სპიკერმა ნენსი პელოსიმ და სენატში დემოკრატების ლიდერმა ჩაკ შუმერმა ჟურნალისტებს აცნობეს, რომ თეთრ სახლში პრეზიდენტთან შეხვედრა დაწყებიდან მალევე შეწყდა. დემოკრატების ლიდერებთან შეხვედრას დროის დაკარგვა უწოდა პრეზიდენტმა დონალდ ტრამპმა. მან ტვიტერზე დაწერა, რომ მას შემდეგ, რაც შეკითხვაზე, მთავრობის მუშაობის განახლების შემთხვევაში დაუჭერენ თუ არა მხარს დემოკრატები მექსიკასთან საზღვარზე კედლის მშენებლობას უარყოფით პასუხი მიიღო, პელოსის და შუმერს დაემშვიდობა და უთხრა, რომ სხვა ვარიანტი არ არსებობს. 9 იანვრის შეხვედრა ბოლო დღეებში მესამე იყო.
აშშ-ის რესპუბლიკელი პრეზიდენტი კონგრესისგან 5,7 მილიარდ დოლარს ითხოვს მექსიკასთან საზღვარზე კედლის მშენებლობისთვის. დონალდ ტრამპი მიიჩნევს, რომ მხოლოდ ამ გზითაა შესაძლებელი საზღვრის დაცვა და არალეგალური იმიგრაციის და აშშ-ში ნარკოტიკების შეტანის შეჩერება. დემოკრატები, რომლებმაც ნოემბრის არჩევნების შედეგად კონგრესის წარმომადგენელთა პალატაში უმრავლესობა მოიპოვეს, კედლის მშენებლობას ეწინააღმდეგებიან და პრეზიდენტს სთავაზობენ 1,3 მილიარდი დოლარით დაფინანსდეს საზღვრის უსაფრთხოებისთვის საჭირო სხვა ზომები.
წარმომადგენელთა პალატისგან განსხვავებით, სენატში უმრავლესობა რესპუბლიკელებს აქვთ. 9 იანვარს პრეზიდენტმა ტრამპმა განაცხადა, რომ რესპუბლიკური პარტია საზღვრის უსაფრთხოების საკითხში ერთიანია. მექსიკასთან საზღვარზე კედლის მშენებლობა დონალდ ტრამპის ერთ-ერთი მთავარი საარჩევნო დაპირება იყო. საარჩევნო კამპანიის დროს ტრამპი აცხადებდა, რომ კედლის მშენებლობის ხარჯებს მექსიკა დაფარავდა. ეს დაპირება პრეზიდენტს არაერთხელ შეახსენეს დმეოკრატების ლიდერებმა. სენატორ ჩაკ შუმერის განცხადებით, დონალდ ტრამპმა მექსიკა ვერ აიძულა ფული გადაეხადა არაეფექტური და უსარგებლო კედლისთვის, ვერც ამერიკელი ხალხი და კონგრესი დაარწმუნა და სწორედ ამას მოჰყვა ფედერალური მთავრობის მუშაობის ნაწილობრივ შეჩერება.
პრეზიდენტის და დემოკრატი კანონმდებლების უთანხმოების გამო, აშშ-ის სახელმწიფო დაწესებულებები 22 დეკემბრიდან იმყოფებიან „შატდაუნის“ მდგომარეობაში. 800 ათასამდე სახელმწიფო მოხელე იძულებით შვებულებაშია, ან უხელფასოდ მუშაობს. 8 იანვარს, ამერიკელებისადმი ტელემიმართვისას პრეზიდენტმა ტრამპმა მექსიკასთნ საზღვარზე შექმნილ ვითარებას ჰუმანიტარული კრიზისი უწოდა, დემოკრატები დაადანაშაულა იმაში, რომ კრიზისს არ აღიარებენ და მათ დააკისრა პასუხისმგებლობა ფედერალური მთავრობის ნაწილობრივ დახურვაზე. თავის მხრივ, კონგრესში დემოკრატების ლიდერებმა პრეზიდენტს მოუწოდეს, განაახლოს მთავრობის მუშაობა და პარალელურად დაიწყონ მოლაპარაკება საზღვრის უსაფრთხოების საკითხებზე.