ისრაელმა უარყო კავშირი სირიაში რუსი სამხედროების დაღუპვასთან
ისრაელმა უარყო რუსეთის ბრალდება, რომ მისი ავიაგამანადგურებლები არიან დამნაშავე სირიაში რუსული სამხედრო თვითმფრინავის Ил 20-ის ჩამოგდების გამო. ისრაელის არმიამ დაადასტურა, რომ გასულ ღამით იერიში მიიტანა სირიის სამთავრობო ძალების ობიექტზე, თუმცა, განაცხადა, რომ სირიის რაკეტსაწინააღმდეგო თავდაცვის ობიექტის მიერ რუსული სამხედრო თვითმფრინავის ჩამოგდების დროს ისრაელის არმიის თვითმფრინავები უკვე ისრაელის საჰაერო სივრცეში იმყოფებოდნენ. ისრაელმა მომხდარზე პასუხისმგებლობა სირიის გარდა დააკისრა ირანს და ლიბანელი შიიტების დაჯგუფებას „ჰესბოლას.“ ისრაელის არმიის ინფორმაციით, სირიის ლატაკიის პროვინციაში დაგეგმილი იერიშის შესახებ რუსეთს წინასწარ აცნობა. ისრაელის შეიარაღებული ძალების სარდლობა მწუხარებას გამოთქვამს რუსი სამხედროების დაღუპვის გამო და მზად არის რუსეთს გადასცეს ყველა საჭირო ინფორმაცია ინციდენტის გამოსაძიებლად.
რუსეთის თავდაცვის სამინისტრომ დღეს განაცხადა, რომ სადაზვერვო თვითმფრინავი Ил-20 სირიის ჰაერსაწინააღმდეგო თავდაცვის სისტემამ ჩამოაგდო, თუმცა, ამაში დამნაშავე ისრაელია, რადგან მისი ავიაგამანადგურებელი F-16 რუსულ თვითმფრინავს ამოეფარა. რუსული მზვერავი თვითმფრინავის ჩამოგდების შედეგად 15 სამხედრო დაიღუპა.