საქართველოს მთავრობას მომზადებული აქვს საკანონმდებლო ინიციატივა, რომლითაც ნებადართული იქნება ფარმაცევტული და კოსმეტიკური საშუალებებისთვის მარიხუანის წარმოება მისი ექსპორტის მიზნით - ამის შესახებ სააგენტო „ინტერპრესნიუსი“ იუწყება. მისი ინფორმაციით, შესაბამისი კანონპროექტის სამუშაო ვარიანტი შსს-ს წარმომადგენლებმა საპარლამენტო უმრავლესობის დეპუტატებს 10 სექტემბერს გააცნეს პარტია “ქართული ოცნების“ ოფისში. სამუშაო ვარიანტის მიხედვით, მარიხუანის წარმოება ლიცენზირებად საქმიანობად გამოცხადდება. სააგენტოს ცნობითვე, მსჯელობის საგანია ვერსია, რომლის მიხედვით, ლიცენზიის მისაღებად გამოცხადდება საერთაშორისო კონკურსი და გამარჯვებული ამ გზით გამოვლინდება. სავარაუდოდ, სალიცენზიო პირობებში განისაზღვრება საქართველოში მარიხუანის წარმოების გეოგრაფიული არეალი, რაოდენობა და ა.შ. „ინტერპრესნიუსის“ ინფორმაციით, იდეას, რომლის განხილვასაც ცხარე კამათი მოჰყვა, მხარს უჭერს პარტია „ქართული ოცნების“ თავმჯდომარე ბიძინა ივანიშვილი.
