«Татар-информ» журналисты «Цифрлы киләчәккә бергәләп» Россия бәйгесендә призер булды
«Ростелеком» журналистлар һәм блогерларның «Цифрлы киләчәккә бергәләп» бәйгесе федераль этабына йомгак ясады. «Татар-информ» корреспонденты Эвелина Киселева бәйгенең «Интернет массакүләм мәгълүмат чаралары» номинациясендә икенче урын алды.
Исегезгә төшерәбез, агентлык журналистын Идел буе федераль округы коллегалары арасында иң яхшысы дип таныдылар, бу аңа федераль этапка чыгарга мөмкинлек бирде.
Конкурска илнең төрле төбәкләреннән 1 300 журналисттан барлыгы 2 232 эш килгән. Шунысын да билгеләп үтәргә кирәк, иң күп эш нәкъ менә «Интернет-массакүләм мәгълүмат чаралары» номинациясендә тәкъдим ителгән — андый 955 материал булган.
«Без массакүләм медиа вәкилләре белән яңа технологияләр үсеше турында фикер алышырга, мәгълүмати технологияләр трендларын бергәләп күзәтергә шатбыз. Без шулай ук белем һәм тәҗрибә уртаклашырга әзер. Мәгълүмати технологияләр өлкәсендәге экспертлар белән хезмәттәшлек журналистларга проблеманы аңларга гына түгел, ә материал язу процессын гадиләштерү һәм аларның сыйфатын яхшырту өчен технологик мөмкинлекләр табарга да ярдәм итәчәк», – дип билгеләп үткән «Ростелеком» ГАҖ мәгълүмати технологияләр буенча өлкән вице-президенты Кирилл Меньшов.