Мамадышта һава шарлары фестивале башланды
22 сентябрьдә «havaФест» һава шарларының беренче фестивалендә Татарстанның Мамадыш районы өстеннән ун аэростат очты.
«Бездә яңа туристик бренд барлыкка килүенә омтылабыз. Фестивальне оештыручылар безнең мәйданчыкны, ландшафтны, рельефны, районның матурлыгын бәяләде һәм фестивальне нәкъ менә бездә үткәрергә карар кылдылар. Район җитәкчелеге бу тәкъдимне кабул итте, чөнки фестиваль безнең җирнең танылуын арттырачак. Бездә күрсәтерлек нәрсәләр бар. Шулай ук без «һавада йөзүне» спорт ягыннан да карыйбыз», - дип сөйләделәр «Татар-информ»га Татарстан Мамадыш районы матбугат хезмәтендә.
Бу көннәрдә Мамадышка төрле шәһәрләрдән - Пермь, Пенза, Мәскәү өлкәсе торак пунктларыннан һәм Россиянең башка төбәкләреннән 10 пилот килгән. Чараны оештыручылар арасында Чаллыдан «Холод» клубы да бар.
Һава шартларына карап, катнашучыларга һәм кунакларга дүрт көн дәвамында искитмәле очышларны күзәтү мөмкинлеге булачак. Пилотлар пассажирлар белән бергә төрле нокталардан очып китәчәк һәм төрле урыннарга төшәчәк. Мисал өчен, 7нче аэростат пассажирлары район имам-мөхтәсибе Илһам хәзрәт Миңнегалиев йорты янында җиргә төшкән.
Бүген кич белән шәһәр ипподромында чараның мәдәни өлеше уза. Очышлардан тыш, фудзона эшләячәк, балалар өчен күңел ачу чаралары оештырыла.