Путин айтишниклар өчен армиядән кичектерү яшен 30га кадәр арттырды
IT-өлкә белгечләрен хәрби хезмәткә чакыруны кичектерү чиге 30 яшькә кадәр арта. Россия Федерациясе Президенты Владимир Путин имзалаган карар хокукый мәгълүмат порталында дөнья күрде.
Үзгәрешләр 2022 елның 2 мартындагы «Россия Федерациясендә мәгълүмати технологияләр тармагын тиз үстерүне тәэмин итү чаралары турында» 83 санлы карарга кертелә. Икенче пункттагы «27 яшь» дигән сүзләр «30 яшь» дигән сүз белән алыштырыла.
«Әлеге указ 2024 елның 1 гыйнварыннан үз көченә керә», — диелә яңа документта.
Россия цифрлы үсеш, элемтә һәм массакүләм коммуникацияләр министры Мәкъсүт Шадаев аңлатканча, сүз аккредитацияләнгән IT-компания хезмәткәрләре турында бара. Үзгәрешләр чакырылыш яшен арттыру белән бәйле — 4 августта Владимир Путин ашыгыч хезмәткә чакыруның югары чиген 30 яшькә кадәр арттыру турында карарга кул куйды.