Татарстан министрлары «Белемең белән уртаклаш» акциясенә кушылды
Бүген, 1 сентябрьдә, Татарстан Республикасы вәкилләре Россиянең «Белем» җәмгыятенең «Белемең белән уртаклаш» акциясенә кушылды.
Чараны оештыручылар хәбәр иткәнчә, мәктәп укучылары һәм студентлар өчен лекцияләрне Татарстан хезмәт, халыкны эш белән тәэмин итү һәм социаль яклау министры Эльмира Зарипова, Татарстан экология һәм табигый ресурслар министры Александр Шадриков, Татарстан сәламәтлек саклау министры Марсель Миңнуллин, Татарстан юстиция министры Рөстәм Заһидуллин, Татарстан авыл хуҗалыгы һәм азык-төлек министры урынбасары Гөлүс Баязитов, ведомстволар җитәкчеләре һәм аларның урынбасарлары, муниципалитет башлыклары һәм шәһәр мэрлары укыды.
Мәктәп укучылары түрәләргә сораулар бирде, кичерешләре турында сөйләде, шулай ук идеяләр белән уртаклашты. Спикерлар сорауларга да җавап бирде.
Казан бүген «Белемең белән уртаклаш» акциясендә катнашучы гына түгел, ә шул ук исемдәге марафон мәйданчыгы да булды.
«Татар-информ» хәбәр иткәнчә, Иннополис лицеенда Россия вице-премьеры Дмитрий Чернышенко мәктәп укучылары өчен «Прогресс технологияләре: цифрлаштыру һәм фиджитал-спорт» темасына ачык дәрес үткәрде.
«Белемең белән уртаклаш» акциясе «Белем. Лекторий» трегы кысаларында старт алды. Аны дүртенче тапкыр оештыралар. Чаралар илнең барлык шәһәрләрендә 1-30 сентябрьдә уза.