Новости за 09.03.2024

Яшел Үзәннең Норлат авылында Илнар Заһидуллин призына турнир узды. Командалар матур, тамашалы уен күрсәтте һәм ахырга кадәр көрәште. Алар көне буе бер-берсе белән ярышты һәм финалга иң көчлеләр чыкты. Бу хакта «Яшел Үзән» хәбәр итә.

Татарстан Республикасы Үзәк сайлау комиссиясе рәисе Андрей Кондратьев булачак сайлауларга әзерлек дәрәҗәсен бәяләү өчен Чистайга килде. Бу хакта «Чистай хәбәрләре» яза.

Түбән Камада яшәүче күп бала тәрбияләүче Анна Хисмәтуллина «Ана даны» медале белән бүләкләнде. Анна һәм аның ире биш бала тәрбияли. Бу хакта хакимиятнең матбугат хезмәте хәбәр итә, дип яза http://nkamsk-rt.ru/.

Махсус хәрби операция зонасыннан ялга кайткан Зәй хәрбие маскировкалау челтәрләре үрүче апалар янына килеп, аларга рәхмәт әйткән. Алар үргән челтәрләрнең дошманнан саклап калуын белдергән. Бу хакта «Зәй хәбәрләре» яза.

Киров шәһәре «Тимер юлчылар» мәдәният йортында Киров дәүләт медицина университеты уздырган милли мәдәниятләр фестивалендә Татарстан һәм Башкортстан студентлары татар халкын тәкъдим иткән. Бу чараны оештыруда катнашкан Арча районы Яңа Кенәр авылы кызы Лилия Латыйпова әйтүенчә, татарларның чыгышы югары бәяләнгән.

Бүген Казанда, «Порт» сәүдә үзәге каршында контракт буенча хәрби хезмәткә сайлап алу буенча мобиль пункт ачылды.

Татарстанда 2023 ел нәтиҗәләре буенча файдалы казылмалар чыгару өлкәсендә эшләүчеләрнең уртача айлык хезмәт хакы иң югарысы булып чыккан. Ул 98 471 сумга тигез һәм республикадагы уртача күрсәткечтән 59,2 процентка артыграк. Татарстанстат әзерләгән республиканың социаль-икътисади хәле турындагы докладта шулай диелә.

Татарстан Үзәк сайлау комиссиясенең Эксперт советы рәисе Роман Беляков «ТИСБИ» идарә университеты студентлары белән очрашты. Бу хакта ТР Үзәк сайлау комиссиясе матбугат хезмәтенең Telegram-каналында хәбәр ителә.

Татарстан Рәисе Рөстәм Миңнеханов ТР Хөкүмәтендә узган традицион киңәшмәдә муниципалитетларга һәм төбәк Гадәттән тыш хәлләр министрлыгына су басуга каршы кирәкле барлык чараларны оештырырга кушты. Бу хакта республика президентының матбугат хезмәте хәбәр итә.

2023 елда Татарстанда 14 267 пар аерылышкан. Бу 2022 ел белән чагыштырганда 301гә кимрәк, диелә Татарстанстат статистикасында.

Хезмәт хакы кимү белән ир-атлар эштән китә, ә хатын-кызлар, гаиләсен калдырып читкә акча эшләргә китмәс өчен, аларның түбән ставкалы урынын били. Россиянең Бәйсез профсоюзлар федерациясе рәисе урынбасары Александр Шершуков шундый фикерен белдерде, дип хәбәр итә РИА Новости агентлыгы.

Чаллыда өч җиңел автомобиль катнашында җитди авария булган, дип хәбәр итте «Татар-информ» агентлыгына шаһитлар.

Татарстан Рәисе Рөстәм Миңнеханов ТР Хөкүмәтендә узган традицион киңәшмәдә Рамазан ае һәм Май чабу атнасы барышында дини йолалар һәм төрле чаралар үткәрү өчен тиешле шартлар тәэмин итәргә кушты. Бу хакта республика җитәкчесенең матбугат хезмәте хәбәр итә.

Татарстан Республикасы Хөкүмәте алдында Россия Федерациясе Президентын сайлауны иң югары оештыру дәрәҗәсендә үткәрү бурычы тора. ТР Рәисе Рөстәм Миңнеханов Хөкүмәт йортында узган киңәшмәдә шулай дип белдерде. Бу хакта республика җитәкчесенең матбугат хезмәте хәбәр итә.

2024 елның гыйнвар нәтиҗәләре буенча Татарстанның мәшгульлек хезмәтләрендә 5047 кеше исәптә торган. Шуларның 4038е эшсезлек статусына ия, диелә Татарстанстат әзерләгән «Татарстан Республикасының социаль-икътисади хәле» докладында.

Татарстанда гыйнвар аенда билгеләнгән пенсияләрнең уртача күләме 20 мең сумнан артып киткән һәм 20 637,6 сум тәшкил иткән. Бу октябрьгә караганда 0,4 процентка күбрәк, диелә Татарстанстат әзерләгән «Татарстан Республикасының социаль-икътисади хәле» докладында.

Татарстан Республикасы Милли музее һәм аның филиаллары Халыкара хатын-кызлар көне уңаеннан гүзәл затларны һәм аларның гаиләләрен бәйрәм чараларына чакыра. Бәйрәм көннәрендә лекция һәм экскурсияләр, күргәзмә һәм викториналар, төрле мастер-класслар оештырыла. Бу хакта ТР Мәдәният министрлыгы матбугат хезмәте хәбәр итә.

Бәйрәм концертына 240тан артык хатын-кыз җыелды.

Бүген Татарстанда алмашынучан болытлы һава торышы көтелә. Бераз кар явачак, дип хәбәр итә ТР Гидрометеорология һәм әйләнә-тирә мохитне күзәтү идарәсенең матбугат хезмәте.

2024 елның беренче ике аенда авыл җирлегендә яшәүче 9 547 өлкән кешене диспансеризация, вакцинация уздыру, планлы госпитализация һәм башка медицина ярдәме күрсәтү өчен Татарстанның медицина учреждениеләренә алып барганнар. Бу ярдәм «Демография» илкүләм проекты кысаларында оештырыла.

Җәй көне Әлмәт шәһәрендә «Авантюрист» тулы метражлы фильмы төшереләчәк. Бу сценарист Андрей Румянцевның криминаль комедиясе. 2009 елда ул Безруков һәм Дюжев белән «Каникулы строго режима» фильмын төшерүдә катнашкан. Бу хакта «Әлмәт таңнары» хәбәр итә.

Чаллының мактаулы гражданы, «Кавказ-Чаллы» ансамбле җитәкчесе Дени Абрамашвили «Җәмигъ» мәчете төзелешенә ярдәм итү өчен «Энергетик» мәдәният сараенда концерт оештыра. Ул 28 апрельгә билгеләнгән. Бу хакта «Шәһри Чаллы» хәбәр итә.

9 мартта 11.00 сәгатьтә Чирмешәндә Яңа Элмәле буасында балык тоту буенча район ярышлары узачак. Бу хакта «Безнең Чирмешән» яза.