Новости за 09.07.2023

Кукмарада Гаилә, мәхәббәт һәм тугрылык көнендә «Икеләтә шатлык» — игезәкләр парады узды. Бәйрәм 30га якын парны берләштерде. Анда иң кечкенә игезәкләрдән алып, өлкәннәр дә катнашты, дип яза «Хезмәт даны» газетасы.

Юл һәлакәтләрен киметү максатыннан, «Теләче» газетасы, Теләче муниципаль районы Башкарма комитеты, район ЮХИДИ бүлеге, юл иминлеге район комиссиясе һәм дәүләт бюджет оешмасының Казан шәһәре территориаль идарәсе профилактика бүлегенең Саба районы бүлеге белән берлектә, машина йөртүчеләр арасында 1 июльдән яңа бәйге игълан ителде. Бу хакта «Теләче» газетасы яза.

Түбән Новгород шәһәренең «Автозавод» мәдәният һәм ял паркында I Идел буе Сабан туе узды.

Бүген Түбән Новгородта Идел буе Сабан туе булды. Ул Түбән Новгородта беренче тапкыр уздырыла. Бәйрәмгә барлыгы 40тан артык төбәктән делегация җыелды.

8 июльдә Дзержинскиның Җәмигъ мәчете территориясендә административ бинаны ачу тантанасы булды, дип хәбәр итә Россия Мөфтиләр шурасының матбугат хезмәте.

Татарстан Премьер-министры Алексей Песошин җир сөрү буенча X Россия ачык чемпионаты җиңүчеләрен бүләкләү һәм күргәзмәне ябу тантанасында Татарстан Республикасының Лаеш районында узган «Бөтенроссия Кыр көне-2023» илкүләм агрокүргәзмәсенә йомгак ясады.

Татарстан Республикасы Премьер-министр урынбасары, Бөтендөнья татар конгрессының Милли Шура рәисе Васил Шәйхразыев татар халкы милләтебезне берләштерүдә хезмәт куя дип саный.

Башкортстанның Дүртөйле районында «Канатлы ат» дигән ат спорты ярышларын кабат үткәрә башлаганнар, дип хәбәр итә «Башинформ».

6 июльдән 8 июльгә кадәр «Урта Идел-Сура-Ока елгалары арасындагы татарлар: тарих һәм хәзерге заман» VIII Бөтенроссия (Идел буе) фәнни-туган якны өйрәнү форумы үтте. Анда «Пенза өлкәсенең татар милли-мәдәни автономиясе» рәисе урынбасары Гөлназ Самочкина катнашты. Бу турыда Пенза татарлары автономиясе «ВКонтакте» челтәрендә хәбәр итте.

Төркиядә яшәп иҗат итүче шагыйрә һәм галимә Чулпан Зариф - Четинның поэзия әсәрләре азәрбайҗан телендә китап буларак дөнья күргән. Бу хакта төрек-төрекмән шагыйре һәм журналист Шәмсетдин Күзәҗи хәбәр итә.

Татарстан Премьер-министры Алексей Песошин «Казан Экспо»да «Бөтенроссия кыр көне – 2023» кысаларында үткән X җир сөрү буенча ачык чемпионатның ябылу тантанасында катнашты. Бу хакта ТР Рәисенең матбугат хезмәте хәбәр итә.

Атна уртасында Мәскәүгә һәм Үзәк Россиягә көзге һава торышы киләчәк. Көндез һава температурасы +16 градустан югары булмаячак. Чәршәмбе соңгы 75 елда иң салкын көн булырга мөмкин, әмма җәй ял көннәренә үз позицияләрен кире кайтарачак, дип хәбәр итә РИА Новости «Фобос» һава торышы үзәгенең әйдәп баручы белгече Евгений Тишковецка сылтама белән.

ЛДПРдан Дәүләт Думасы депутатлары, фракция лидеры Леонид Слуцкий җитәкчелегендә, палата каравына 10 елдан артык рәсми никахта яшәүче һәм балалары булган гаиләләргә җир кишәрлеген бушлай бирү турында закон проектын кертәчәк. Бу хакта ТАСС Слуцкийның матбугат хезмәтенә сылтама белән хәбәр итә.

«Татар-информ» агентлыгы хәбәрчесе Үзбәкстан Президенты сайлауларын яктырту барышында илнең башкаласы Ташкенттагы 105 нче сайлау участогында булды. Ул вакытта монда кеше күп иде, дип яза Арслан Минвәлиев.

Курган өлкәсе Йолдыз (Эчкен) авылы мәктәбе укучылары өчен велосипедлар сатып алынган, дип хәбәр итә Бөтендөнья татар конгрессы. Бу велосипедлар 12 июльдә Милли Шураның киңәйтелгән утырышында балаларга тапшырылачак.

Татарстанда һава шартлары начарлану көтелү сәбәпле, давыл турында кисәтү игълан ителде. Бу хакта Татарстанның Гидрометереология үзәге хәбәр итә.

8 июльдә Түбән Новгород Җәмигъ мәчетендә Россия мөселманнарының рухи лидеры мөфти шәех Равил Гайнетдин катнашында Түбән Новгород өлкәсе мөселманнары Диния нәзарәтенең VIII съезды булды. Съездда Диния нәзарәте рәисе итеп кабаттан Гаяз Закиров сайланды, дип хәбәр итә Россия Мөфтиләр шурасының матбугат хезмәте.

Агымдагы елның гыйнвар-апрель айларында Татарстан предприятиеләре һәм оешмалары хезмәткәрләренең, шул исәптән кече эшмәкәрлек субъектларының реаль хезмәт хакы узган елның шул ук чоры белән чагыштырганда 9 процентка арткан. Бу Татарстанстат мәгълүматларыннан күренә.

Новокузнецк шәһәренең «Чулпан» мәчетендә балалар өчен берничә көн дәвамында рухи-әхлакый тәрбия темасына төрле чаралар узды, дип хәбәр Россия мөселманнарының Дини җыены Үзәкләштерелгән дини оешмасының матбугат хезмәте.

Узган төндә сәгать уникедә водолазлар Болгардагы иске пристань янында батып үлгән 48 яшьлек ир-атның мәетен тапкан.

Үзбәкстан Президентын сайлауда катнашу җирле вакыт буенча 11.00 сәгатькә 33,54% тәшкил итә. Бу хакта журналистларга илнең Үзәк сайлау комиссиясе рәисе урынбасары Бахром Кучкаров хәбәр итте.

Бүген Түбән Новгородта ТАССРның халык артисты Рәшит Ваһаповка мемориаль такта ачылды. Бу турыда Бөтендөнья татар конгрессы хәбәр итте.

Кичә кич белән Зәй районы Аксар авылы янында юл һәлакәте булган, дип хәбәр итә «Татар-информ»га һәлакәт шаһитлары.

Бүген Түбән Новгород шәһәрендә «Ярминкә» мәчете нигезенә беренче таш салынды. Бу турыда Бөтендөнь татар конгрессы хәбәр итте.

Көчле яңгырлар аркасында, Сочиның Хоста районында унга якын автомобильне су ташкыны агызып алып киткән, дип хәбәр итә Россия Гадәттән тыш хәлләр министрлыгының Краснодар крае буенча Баш идарәсе матбугат хезмәте.