Новости за 20.05.2023

Татарстан Рәисе Рөстәм Миңнеханов «Казан Экспо»да узган XIII Бөтенроссия татар дин әһелләре форумыннан фотолар күрсәтте. Ул яшьләрне татар теленә өйрәтүнең, гаиләдә татар теле мохитен саклауның мөһимлеген һәм туган телнең татар халкының төп терәкләренең берсе дип атады.

Татарстан Республикасының Свердловск өлкәсендәге Даими вәкиллеге ярдәме белән Россиянең Көрәш федерациясе, Свердловск өлкәсенең Көрәш федерациясе Свердловск өлкәсенең Шәкүр авылында көрәшкә багышланган семинар һәм мастер-класс уздыра. Катнашучыларга хөкемдарлык итү хокукы бирә торган сертификатлар тапшырылачак. Бу хакта Вәкиллек сайтында хәбәр ителә.

Татарстан Рәисе Рөстәм Миңнеханов фикеренчә, Ислам дине дөньядагы дөрес булмаган күренешләргә каршы көрәшә ала.

Россия мөселманнары Дини җыены рәисе, Мәскәү шәһәре, Үзәк төбәк һәм Чувашия Республикасы мөфтие, Россия Федерациясенең Иҗтимагый палатасы әгъзасы Әлбир хәзрәт Крганов Курган өлкәсе Йолдыз авылына Чувашия мөселманнары күрсәтәчәк ярдәм турында сөйләде.

Россиянең Азия өлеше мөселманнары Диния нәзарәте рәисе, мөфти Нәфигулла хәзрәт Аширов «Милли тормыш һәм дин» XIII Бөтенроссия татар дин әһелләре форумы пленар утырышында дини мирас турында уйланырга тәкъдим итте.

Янгында каза күргән Курган өлкәсе Йолдыз (Эчкен) авылы имамы Әхмәдулла хәзрәт Хәбибуллин авылны төзекләндерүдә ярдәм сорап, Татарстан Республикасы Рәисе Рөстәм Миңнехановка мөрәҗәгать итте.

Бүген Казан федераль университетының (КФУ) төп бинасы ишегалдында 1803 елда Коръәннең беренче тиражы басылу уңаеннан истәлек тактасы ачтылар. ТантанадаТатарстан Рәисе Рөстәм Миңнеханов, Россия мөселманнары Диния нәзарәте рәисе, мөфти шәех Равил хәзрәт Гайнетдин, Татарстан мөфтие Камил хәзрәт Сәмигуллин катнашты.

Россия Мөфтиләр шурасы рәисе, Россия Федерациясе мөселманнары Диния нәзарәте рәисе, мөфти-шәех Равил хәзрәт Гайнетдин Йолдыз (Эчкен) авылына ярдәмне бердәмлекнең бер күрсәткече, дип әйтте.

Татарстан Республикасы мөселманнары Диния нәзарәте рәисе, мөфти Камил хәзрәт Сәмигуллин фикеренчә, дини əдəбиятны тикшерү өчен, Россиякүлəм дини экспертлар оешмасы кирəк. «Милли тормыш һәм дин» XIII Бөтенроссия татар дин әһелләре форумы пленар утырышында ул дини әдәбият белән бәйле мәсьәләләрне күтәрде.

Коронавирус пандемиясе төгәлләнүгә карамастан, Россиядә берникадәр тәнәфестән соң кабат эчүче кешеләр саны арта башлаган, диде Казан наркологы Галимҗан Шакирҗанов. Аның сүзләренчә, эчкечелекнең мондый үсеше пандемиянең беренче көннәрендә күзәтелгән булган.

«Милли тормыш һәм дин» XIII Бөтенроссия татар дин әһелләре форумының иң өлкән һәм иң яшь делегатлары билгеле.

Курган өлкәсенең Йолдыз авылы татар халкы бердәмлеге символына әверелергә мөмкин. ТР Премьер-министры урынбасары, Бөтендөнья татар конгрессының Милли Шура рәисе Васил Шәйхразыев «Казан Экспо» күргәзмә үзәгендә «Милли тормыш һәм дин» XIII Бөтенроссия татар дин әһелләре форумы пленар утырышында шул хакта әйтте.

Кариев театры иҗатчыларны һәм иҗат итергә теләүчеләрне «Караш» беренче инсценировка мәктәбе проектына чакыра.

Татарстанда елга буйлап сәяхәтләр елдан-ел популярлаша. «Татфлот» компаниясе мәгълүматлары буенча, үткән ел 260 мең кеше теплоходларда сәяхәт иткән, әле тагын барлыгы 250 меңнән артык кеше елга буйлап даими рейсларда йөргән.

Түбән Каманың 1нче поликлиникасында артериаль гипертония белән авыручылар өчен берничә чара уза. Бу хакта «Туган як» сайтында Түбән Кама үзәк хастаханәсе матбугат хезмәтенә сылтама белән хәбәр итә.

Чүпрәледә 60 ел һәм 65 ел бергә гомер юлы үткән мөхтәрәм парларны котладылар. Бу хакта «Туган як» сайтында хәбәр ителә.

Чирмешән районы Түбән Кармалка авылы янында 30 мең тонна бөртек сыйдырышлы элеватор төзергә җыеналар. Аның кайда булачагы, урыны хакында муниципаль район башлыгы Рамил Айбатовның «БИО-АГРО» җәмгыяте вәкилләре белән очрашуында килешенгән. Бу хакта «Безнең Чирмешән» хәбәр итә.

26 майда Чүпрәленең Татар Төкесе авылында традиция буенча изге бәйрәм - «Кадыкай Абыз бабайны искә алу» көне уздырыла. Бу хакта «Туган як» сайтында хәбәр ителә.

Басма матбугатка язылу чорында, һәр яртыеллыкта «Язылу бүләк ит» акциясе уза. Бу юлы «Лениногорские вести» һәм «Заман сулышы» газеталарына йөздән артык нөсха яздыртуда депутатлар ярдәм итте. Шәһәр һәм район кешеләренә киләсе яртыеллыкта газеталар киләчәк. Бу хакта «Заман сулышы» газетасы сайтында хәбәр ителә.