Земан повика без хистерија да се спроведат истрагите за експлозиите во 2014

Чешкиот претседател Милош Земан изјави дека постојат две теории за тоа што ги предизвикало експлозиите во депо за муниција во Чешка во 2014 година. Настанот предизвика сериозен дипломатски раздор со Русија. Земан вели дека и двете теории мора да се испитаат.

Чешкиот претседател во денешното телевизиско обраќање до јавноста, што е прво негово појавување, откако изби несогласувањето со Русија, рече дека според едната верзија на настаните, руските разузнавачки служби биле вклучени во смртоносната експлозија. Другата верзија, рече тој, е дека експлозијата била предизвикана од нестручно ракување со муниција.

„Ги сфаќам сериозно и двата тека на истрагите и сакам темелно да бидат истражени“, рече Земан.

Тој го поддржа протерувањето на 18 руски дипломати од Прага, за кои чешките безбедносни служби имале докази дека се агенти на руските служби ГРУ и СВР, со што на 17 април почна чешко-руската дипломатска војна. Ден потоа Русија за непожелни прогласи 20 чешки дипломати од амбасадата во Москва.

Земан цитирајќи го извештајот на Чешката безбедносна информативна служба, праша што барале таму двајцата Руси? Сигурно таму не биле како туристи, рече тој.

Земан вели дека има причина за сомневање, но дека треба да се утврди вистината и да открие дали сомнението за руските разузнавачи е оправдано. Тој бара истрагите да се спроведат на мир и без хистерија, а после истрагата владата да носи одлуки дали и како Русија треба да биде казнета. Во случај да се открие дека тие се виновни за експлозијата и покрај тоа што поддржува фер односи со сите важни земја,

Руската Федерација ќе мора да ја плати цената на овој претпоставен терористички акт. Еден од начините за казнување би било да се елиминира руската компанија Росатом од тендерите за градење на нова нуклеарна централа. Но доколку се покаже дека Русија нема одговорност, тогаш тоа ќе донесе сериозни последици за внатрешната политика во Чешка.

Пуч, отров, хакирање, саботажа: Која е единицата 29155 на руското ГРУ?

Земан, чии овластувања како претседател се главно церемонијални, честопати изразуваше проруски став и се сметаше за пријателски настроен кон Москва.

На 16 октомври во 2014 година, се случи експлозија во складиште за оружје близу источниот чешки град Врбетице, а подоцна беа пронајдени телата на двајца Чеси. Во близина, за два месеци имаше уште една експлозија.