Հս. Կորեայի միջուկային մղումը կարող է աղետային հետևանքների հանգեցնել. ԱՄՆ պետքարտուղար
Կորեական թերակղզու շուրջ իրավիճակը շարունակում է լարված մնալ: Միացյալ Նահանգների պետքարտուղար Ռեքս Թիլերսոնը նախազգուշացրել է, որ եթե Փհենյանը շարունակի անտեսել միջազգային հանրության կոչերն ու զարգացնի երկրի վիճահարույց միջուկային ծրագիրը, հետևանքներն աղետային կլինեն:
Ինչպես նշում է The Guardian-ը, ԱՄՆ պետքարտուղարն այս մասին ասել է ՄԱԿ-ի Անվտանգության Խորհրդի (ԱԽ) վերջին նիստի ժամանակ:
Ըստ պարբերականի՝ Թիլերսոնը փորձել է ճնշում գործադրել Չինաստանի վրա՝ պահանջելով զսպել այդ երկրի համար դաշնակից համարվող Հյուսիսային Կորեային: Մինչդեռ ՄԱԿ-ի ԱԽ-ում Չինաստանի մշտական ներկայացուցիչ Վանգ Լին հակադարձել է՝ նշելով, որ հյուսիսկորեական միջուկային սպառնալիքի հարցի լուծումը Չինաստանի ձեռքերում չէ:
«Եթե այժմ գործի չանցնեք աշխարհի անվտանգությանն առնչվող կարևորագույն հարցին լուծում տալու համար, դա կունենա աղետալի հետևանքներ: Սեուլի կամ Տոկիոյի դեմ միջուկային հարձակման սպառնալիքն իրական է: Եվ այն, որ Հյուսիսային Կորեան բավականաչափ կզարգանա նաև ԱՄՆ-ին հարվածելու համար, միայն ժամանակի հարց է»,-նշել է Թիլերսոնը:
Պաշտոնյան ընդգծել է, որ այժմ Վաշինգտոնը քննարկում է Փհենյանին կանգնեցնելու համար բոլոր հնարավոր տարբերակները՝ այդ թվում նաև ռազմական: Մինչդեռ չինական կողմը նշել է, որ տվյալ հարցը չի կարող ռազմական լուծում ունենալ:
Ինչպես ավելի վաղ հայտնել էր Tert.am-ը, Միացյալ Նահանգների նախագահ Դոնալդ Թրամփը Reuters լրատվական գործակալությանն ասել էր, որ Փհենյանի հետ խոշոր կոնֆլիկտի հավանականությունը մեծ է՝ չնայած, որ ինքը կնախընտրեր այդ հարցը լուծել դիվանագիտական ճանապարհով:
«Մեծ է հավանականությունը, որ մենք վերջիվերջո խոշոր, շատ խոշոր կոնֆլիկտ կունենանք Հյուսիսային Կորեայի հետ: Դա միանշանակ է: Մենք շատ կուզենայինք հարցը դիվանագիտական ճանապարհով լուծել, բայց դա չափազանց բարդ է»,- ասել էր նախագահը:
Հիշեցնենք, որ Հյուսիսային Կորեայի ղեկավար Կիմ Չեն Ընը սպառնացել է գերհզոր կանխարգելիչ հարված հասցնել Միացյալ Նահանգներին՝ այդ երկրի կառավարությանը նախազգուշացնելով «գործ չունենալ իրենց հետ»: Այնուհետև պետական լրատվամիջոցները հայտարարել են, որ Հյուսիսային Կորեան կարող է հաշված վայրկյանների ընթացքում երկրի երեսից ջնջել ԱՄՆ-ն ու իր թշնամուն մոխրի վերածել:
Փհենյանի ու Վաշինգտոնի միջև նախապատերազմական իրավիճակի ֆոնին Չինաստանը 150.000-անոց զորք է տեղակայել Հյուսիսային Կորեայի հետ սահմանին: Միաժամանակ Ռուսաստանի Դաշնության նախագահ Վլադիմիր Պուտինը կարգադրել է ուժեղացնել այդ երկրի հետ սահմանային պաշտպանությունը, ավելացնել զինվորների ու անհրաժեշտ սարքավորումների, զինտեխնիկայի քանակը:
Միացյալ ազգերի կազմակերպությունում Հյուսիսային Կորեայի ներկայացուցիչ Կիմ Ին Ռյոնն ԱՄՆ-ին մեղադրել է Կորեական թերակղզում լարված իրավիճակ ստեղծելու համար՝ նախազգուշացնելով, որ ցանկացած պահի կարող է ջերմամիջուկային պատերազմ սկսվել: