Ընտրություններում հաղթելու դեպքում վարչապետը ես եմ լինելու. Գագիկ Ծառուկյան
«Բարգավաճ Հայաստան» կուսակցության նախագահ, «Ծառուկյան» դաշինքի համամասնական ցուցակը գլխավորող Գագիկ Ծառուկյանն այսօր՝ «Ուրվագիծ» հաղորդման ժամանակ ամփոփելով քարոզարշավի ընթացքում քաղաքացիների հետ հանդիպումները, հայտարարեց, որ ապրիլի 2-ին կայանալիք խորհրդարանական ընտրություններում հաղթելու դեպքում վարչապետը ինքն է լինելու:
Պատասխանելով հարցին, թե ով է լինելու իրենց վարչապետը, եթե հաղթեն ընտրություններում, Գագիկ Ծառուկյանը պատասխանեց. «Դա քննարկելո՞ւ հարց է: Ես ասել եմ, որ իմ ժողովրդի առաջ պարտք ունեմ կատարելու, ես եմ կատարելու, վարչապետը ես եմ լինելու, ես եմ օրենք փոխելու, համակարգ ստեղծելու, մարդկանց փոխելու»:
Լրագրողի դիտարկմանը, թե ընդդիմախոսներն ասում են, որ 15 կետանոց փաթեթը, որը ներկայացրել են ընտրողներին ու խոստացել դրանք մեկ ամսում կյանքի կոչել, հնարավոր չէ անգամ տարիների ընթացքում իրականացնել, Գագիկ Ծառուկյանը չհամաձայնեց. «Այդ ընդդիմախոսներն ովքե՞ր են, լիարժեք պատկերացնո՞ւմ են՝ տնտեսություն, աշխատանք, զարգացում, որ նման բան են ասում: Ես ասել եմ, պատրաստ եմ ամեն հարցը բացատրելու նրա համար, ով դա չի հասկանում»:
Խոսելով իրենց առաջարկած 15 կետերի մասին՝ ԲՀԿ նախագահն ասաց, որ առողջապահության համակարգում առաջարկում է, օրինակ, սերտիֆիկացիա մտցնել, որպեսզի մարդն անձամբ ստանա գումար, փոքր ու միջին բիզնեսին ազատել հարկերից, առաջարկում է նվազեցնել վարկային տոկոսները, կրճատել բանկերի թիվը:
Խոսելով Լեռնային Ղարաբաղի հակամարտության կարգավորման մասին՝ նա նշեց, թե աշխարհում չկա մի նորմալ մարդ, որ չցանկանա, որ ղարաբաղյան հիմնահարցը լուծվի խաղաղ բանակցային տարբերակով:
«Խաղաղ բանակցային կարգով կարգավորվելու համար պետք է, որ Հայաստանը ուժեղ լինի, հզոր, զարգացող: Ղարաբաղի ճակատագիրը որոշողը պետք է լինի ղարաբաղցին, ով այնտեղ ապրում է, արարում է, սահման է պահում: Իսկ Հայաստանը պետք է ուժեղ լինի, որ Ղարաբաղի թիկունքին կանգնի, խաղաղությունը անվտանգությունը ապահովի»,- շեշտեց նա:
Հարցին՝ պայմանավորվե՞լ եք իշխանությունների հետ, Գագիկ Ծառուկյանը բացասական պատասխան տվեց. «Եթե ես դուրս եմ եկել պայքարի, տեսնում եք՝ ինչ է կատարվում, ո՞նց կարելի է այդպիսի բան ասել: Եթե պայմանավորվածություն լիներ, իրար հետ միասին կգնայինք: Բայց դուք տեսնում եք, որ այսօր պայքար է, պայքարը մեր երկուսի մեջ է՝ ով պիտի լինի առաջինը»: