ԵԱՀԿ նախագահը կոչ է արել ԼՂ հարցում «վստահություն ձեւավորել»
ԵԱՀԿ գրասենյակի փոխանցմամբ՝ այս մասին Սեբաստիան Կուրցն ասել է ԵԱՀԿ Մինսկի խմբի համանախագահների հետ հանդիպմանը։
«Մեկ տարի առաջ տեղի ունեցած մարտական գործողությունները եւ բռնությունները, որոնք վերջին երկու տասնամյակի ամենավատ դրսեւորումներն էին, հանգեցրին ավերածությունների, տառապանքի եւ մարդկային կորուստների։ Սա վառ ապացույց էր, թե որքան արագ կարող է պատերազմի մեխանիզմը խարխլել խաղաղության հասնելու ջանքերը։ Այս կապակցությամբ մենք բոլոր կողմերին կոչ ենք անում զերծ մնալ այնպիսի գործողություններից, որոնք վտանգում են հրադադարը»,- ասել է Սեբաստիան Կուրցը։
Նա կոչ է արել բոլոր կողմերին հանձնառություն ստանձնել՝ խստորեն հետեւելու միջազգային պարտավորությունների կատարմանը, քանի որ «պատերազմական գործողությունները երբեք չեն կարող արդարացված լինել»:
ԵԱՀԿ գործող նախագահը հույս է հայտնել, որ կողմերը նոր խթան կհաղորդեն բանակցություններին։
«Շփման գծում արձանագրված բախումները եւ հրադադարի լուրջ խախտումները մեզ հատկապես մտահոգել են վերջին մեկ տարվա ընթացքում։ Ներկայում ճիշտ ժամանակն է կենտրոնանալ վստահության մեխանիզմների ձեւավորման, ինչպես նաեւ բովանդակային բանակցությունների վերսկսման համար պրագմատիկ եւ գործնական քայլեր անելու ուղղությամբ»,- ընդգծել է նա։
Սեբաստիան Կուրցն իր ցավակցությունն է հայտնել ապրիլյան պատերազմի ընթացքում զոհված անձանց ընտանիքներին։
«Մեկ տարի առաջ տեղի ունեցածի հետեւանքները հայերի եւ ադրբեջանցիների համար դժվարացնում են հավատալ խաղաղությանը, բայց ինչպես ես բազմիցս հայտարարել եմ, Լեռնային Ղարաբաղի հակամարտությանը ռազմական լուծում չի կարող ունենալ։ Մենք այժմ պետք է խաղաղության ծրագրեր կազմենք եւ թույլ չտանք պատերազմի վերսկսումը՝ իր բոլոր ահավոր հետեւանքներով հանդերձ»,- հավելել է ԵԱՀԿ նախագահը:
Նա ընդգծել է, որ ԵԱՀԿ համանախագահությունը պատրաստակամ է բոլոր ջանքերը ներդնել Վիեննայում եւ Սանկտ Պետերբուրգում ձեռք բերված պայմանավորվածությունները կյանքի կոչելու համար։