Сунтаар сиригэр-уотугар куйуур буолла

Соторутааҕыта кэрэ көстүүлээх сирдэрдээх Тэҥкэ нэһилиэгин Саҥа Күөлүгэр «Бизнес киинэ» МАУ, «Тэҥкэ» турбазата куйуур тэрийэн ыыттылар. Куйуурдааһыҥҥа Ньурба улууһун Таркаайы нэһилиэгиттэн икки хамаанда, Өҥөлдьөттөн икки хамаанда, Мииринэй оройуонун Арыылааҕыттан биир хамаанда, биһиги улууспутуттан Куокуну нэһилиэгиттэн икки хамаанда, Бордоҥ нэһилиэгиттэн үс хамаанда кыттыыны ыллылар. Илимниир, Сунтаар, Сиэйэ, Хадан нэһилиэктэрэ биирдии хамаанданан туруордулар. Хамаанда үс кыттааччылаах (18-30 диэри, 31-50 диэри уонна 51-тэн үөһэ саастаах дьон).

Күммүт, халлааммыт болдьообут курдук үчүгэй буолан биэрдэ. Күн чаҕылыччы тыган сып-сылаас. Күрэхтэһии улахан тыҥааһыннаахтык, көхтөөхтүк барда. Күрэх бастакы көрүҥэ – ойбон алларыылаах эстэпиэтэ. Иккис көрүҥ – бэрэбинэҕэ туран сыттыгынан охсуһуу. Үһүс көрүҥ – кууллаах хаары сүгэн сүүрүү. Төрдүс көрүҥҥэ хамаандаттан биирдии киһи иккилии ойбону алларан күрэхтэстилэр. Ким бастыырын, бириистээх миэстэҕэ тиксэрин бүтэһик түһүмэх быһаарда. Бүтэһик көрүҥҥэ, очукуо тэҥнэһэн, ким элбэх балыгы ылбыт ол инники түстэ.

Судьуйалааһын эҥкилэ суох үчүгэйдик барда. Манна тустууга успуорт маастара, Куокунуга өр сылларга баһылыгынан үлэлээбит Валерий Винокуров сүрүн судьуйа буолла. Дуобакка успуорт маастара, Сунтаар улууһун дуобакка үрдүкү тириэньэрэ Валерий Сидоров, кикбоксиҥҥа аан дойду икки төгүллээх чөмпүйүөнэ, Таркаайы нэһилиэгин баһылыга Василий Васильев кэлэннэр, судьуйалааһыҥҥа улахан көмөнү оҥордулар. Элбэх киһи хамаандалартан бэрэстэбиитэл быһыытынан үлэлэстилэр.

Күрэх түмүгүнэн I миэстэни Куокуну иккис хамаандата ылла. II миэстэҕэ Ньурба улууһун Таркаайы иккис хамаандата, III миэстэни Хадан хамаандата ыллылар. Кыайыылаахтар грамоталарынан, мэтээллэринэн уонна сыаналаах бириистэринэн наҕараадаланнылар. Ону таһынан кыттыбыт хамаандалар араас номинацияларга тигистилэр.