Եվրոպական դատարանը չի մերժել Վահան Շիրխանյանի գանգատը. փաստաբանը պարզաբանում է
Այնպես չի որ Եվրոպական դատարանը մերժել է Վահան Շիրխանյանի գանգատը, այդպիսի բան չի եղել, Արդադատության նախարությունը տարածել է տեղեկություն, որի իմաստը լավ չի պարզաբանել. Tert.am-ի հետ զրույցում ասաց Նորքի զինված խմբի գործով մեղադրյալ, պաշտպանության նախկին փոխնախարար Վահան Շիրխանյանի փաստաբան Հայկ Ալումյանը:
Նշենք, որ ըստ նախարարության՝ Եվրոպական դատարանը մերժել է միջանկյալ միջոց կիրառելու վերաբերյալ Վահան Շիրխանյանի խնդրանքը:
«Իրականում տեղի է ունեցել այն, որ կա պարոն Շիրխանյանի գանգատը Եվրոպական դատարանում, որից առաջինը վերաբերում է վատ վերաբերմունքին, կոնվենցիայի 3-րդ հոդված և երկրորդը՝ ապօրինի կալանավորմանը, սա էլ 5-րդ հոդված: Դրանից հետո, երբ գանգատը ներկայացվեց Եվրոպական դատարան, եղել է գործն առաջնահերթության կարգով քննելու միջնորդություն, որը նույնպես բավարարվել է, այսինքն՝ Եվրոպական դատարանը որոշում ունի, որ պարոն Շիրախանյանի գործը պետք է քննի առաջահերթության կարգով և շատ շուտով մենք այդ գործով կունենաք վճիռ»,-ասաց նա:
Հայկ Ալումյանը շարունակեց, թե դրանից հետո երրորդ դիմումն է եղել Շիրխանյանի փաստաբանների կողմից: «Փաստաբանները խնդրել են նախքան գործի հանգուցալուծումը ՝ պարտադրել, որ պետությունը պարոն Շիրխանյանին շտապ տեղափոխի հիվանդանոց, մինչև գործը Եվրոպական դատարանում արագացված կարգով քննեն: Այս երրորդ խնդրանքն է ընդամենը մերժել Եվրոպական դատարանը, այն էլ, հավանաբար, հաշվի առնելով, որ մինչ այդ պետությունը ինչ-որ բան արել է այդ մասով:
Պետությունն առաջ ընկնելով՝ նախքան Եվրոպական դատարան ներկայացնելը, դա արել է և դրա համար Եվրոպական դատարանը միջանկյալ միջոցը մերժեց և միգուցե հաշվի առնելով, որ շուտով վերջնական որոշում է կայացվելու այդ գործով և միջանկյալ որոշման անհրաժեշտություն չկա. պետությունն ինքն արեց այն, ինչ մենք ակնկալում էինք Եվրոպական դատարանից, այսինքն՝ տեղափոխեց հիվանդանոց»,-ասաց նա:
Փաստաբանի խոսքով՝ շուտով վճիռը կլինի և Եվրոպական դատարանը ամբողջ ծավալով հարցերին կանդրադառնա և ամբողջական որոշում կկայացվի:
Դիտարկմանը, թե Դատախազությունը վստահեցրել էր, որ Վահան Շիրխանյանը գտնվում է բավարար առողջական վիճակում, կարող է ինքնուրույն տեղաշարժվել, Հայկ Ալումյանը պատասխանեց. «Ես հիշեցնեմ, որ Արթուր Սարգսյանի վերաբերյալ էլ այդ նույն սուբյեկտները նույն եռանդով հայտարարություն էին տարածում, որ նրա առողջական վիճակն էլ ծայրահեղ վատ չէ: Այդ սուբյեկտներին ուղղակի պետք չէ հավատալ, իրենք իրենց անունից տարածում են տեղեկություն, որի հավաստիությունը միշտ կասկածելի է»:
Հարցին, թե այսինքն՝ ըստ նրա, դաս չեղավ «Հաց բերող» Արթուր Սարգսյանի մահը, պատասխանեց. «Դե եթե դաս լիներ հիմա այսպես չէին անի էլի»:
Իսկ թե այս պահին ինչպես է Վահան Շիրխանյանի առողջական վիճակը, արդյոք բուժում ստանալուց հետո կա՞ փոփոխություն, փաստաբանը բացասական պատասխան տվեց։
«Փոփոխությունը բացասական է, ամեն անգամ, որ ես տեսնում եմ, երկու տարբերակ կա՝ մեկ լինում է, որ ոչ մի փոփոխություն չկա, մեկ էլ լինում է բացասական փոփոխություն։ Դեռ ոչ մի անգամ չի եղել, որ դրական փոփոխություն տեսնեմ: Այդ անտանելի խոնավ պայմաներում մարդ որ գրիպ էլ ունենա, չի կարող գրիպից բուժվել, ուր մնաց ծանր հիվանդությունից»,-եզրափակեց նա: