Ինչ թանկարժեք քարերով ու մետաղներով է համալրվել Ֆիննախի պետական գանձարանը 2016-ի և 2017 -ի ընթացքում
Կառավարության վաղվա նիստի օրակարգում է ՀՀ Ֆինանսների նախարարության աշխատակազմի «Թանկարժեք մետաղների և թանկարժեք քարերի պետական գանձարան» գործակալության թանկարժեք մետաղների և թանկարժեք քարերի պետական պահուստների 2016թ. համալրման և ծախսման վերաբերյալ հաշվետվության Կառավարության արձանագրային որոշման նախագիծը:
Ըստ այդմ՝ պետական գանձարանի կողմից 2016-ի ընթացքում կատարվել է թանկարժեք մետաղների և թանկարժեք քարերի ընդունման թվով 6 գործարք, որոնց արդյունքում պետական պահուստները համալրվել են` 1273 հատ՝ 3938.2 գրամ ընդհանուր քաշով ոսկյա իրերով, 1862 հատ` 6921.08 գրամ ընդհանուր քաշով արծաթյա իրերով և 2702.78 կարատ ադամանդով:
Այլ աղբյուրներից համալրում տեղի չի ունեցել:
Պետական գանձարանում գտնվող թանկարժեք մետաղների, թանկարժեք քարերի, ինչպես նաև դրանցից պատրաստված իրերի ընդհանուր արժեքը 01.01.2017թ. դրությամբ կազմել է 1,897,734,749.1 դրամ:
Ընդհանուր արժեքում ներառված չէ Պետական գանձարանում հաշվառված թանկարժեք մետաղներից և թանկարժեք քարերից պատրաստված բարձր գեղարվեստական և պատմամշակութային արժեք ներկայացնող իրերի արժեքը:
Պետական գանձարանում գտնվող թանկարժեք մետաղների արժեքները 01.01.2017թ. դրությամբ կազմել են` ոսկի` 248.8 մլն. դրամ, արծաթ` 4.7 մլն. դրամ, պլատին` 42.7 մլն.դրամ, պալադիում` 11.2 մլն. դրամ: Պետական գանձարան տեղեկատվություն է ներկայացրել թվով 88 կազմակերպություններ, որոնց հաշվեկշիռներում հաշվառված են թանկարժեք մետաղներ, թանկարժեք քարեր և դրանցից պատրաստված իրեր:
Պետական գանձարանի կողմից հաշվառվել են Հայաստանի թանգարաններում առկա ազգային պահուստի հետևյալ արժեքները` ոսկի՝ 64,4 կգ, արծաթ՝ 1436,2 կգ, պլատին՝ 0,5 կգ և պալադիում՝ 0.02 գրամ, իրեր այլ թանկարժեք մետաղների համաձուլվածքից՝ 181,8կգ :
Պետական գանձարանի կողմից հաշվառվել են պետական մարմինների, պետական հիմնարկների, պետական ոչ առևտրային կազմակերպությունների և 100 տոկոս պետական մասնակցությամբ իրավաբանական անձանց հաշվեկշիռներում առկա պետական պահուստի հետևյալ արժեքները` ոսկի՝ 1.7 կգ, արծաթ՝ 25.6 կգ, պլատին՝ 63,5 կգ, պալադիում՝ 0,3 կգ, իրիդիում՝ 10,8 կգ, ռոդիում՝ 0,5 կգ, օսմիում՝ 2.2 գրամ:
Նախագծին կից ներկայացված տեղեկանք հիմնավորման մեջ նշվում է, որ որոշման նախագծի ընդունումը բխում է «Թանկարժեք մետաղների մասին» ՀՀ օրենքից, որի համաձայն՝Ֆինանսների նախարարության թանկարժեք մետաղների և թանկարժեք քարերի պետական գանձարանը յուրաքանչյուր ֆինանսական տարվա ընթացքում թանկարժեք մետաղների և թանկարժեք քարերի պետական պահուստների համալրման ու ծախսման մասին մինչև հաջորդող տարվա մարտի 15-ը Հայաստանի Հանրապետության կառավարություն է ներկայացնում հաշվետվություն:
Հիշեցնենք, որ պետական գանձարանի պահուստների ձևավորումն ու համալրումը կատարվում է պետական բյուջեի միջոցների հաշվին, ներքին և արտաքին շուկաներից ձեռք բերված թանկարժեք մետաղներով և թանկարժեք քարերով, թանկարժեք մետաղներից և թանկարժեք քարերից պատրաստված իրերով, օրենքով սահմանված կարգով բռնագրավված, հօգուտ պետության տիրազուրկ ճանաչված, ժառանգության իրավունքով կամ նվիրատվությամբ պետությանն անցած թանկարժեք մետաղներով, թանկարժեք քարերով, ինչպես նաև թանկարժեք մետաղներից և թանկարժեք քարերից պատրաստված իրերով, թանկարժեք մետաղների և թանկարժեք քարերի հազվագյուտ բնակտորներով և գանձերով, պետական պաշտոնատար անձանց կողմից ի պաշտոնե ստացած թանկարժեք մետաղներից և թանկարժեք քարերից պատրաստված նվերներով, պետական հիմնարկների ու կազմակերպությունների գույքի վերանորոգումից, դուրսգրումից և օտարումից գոյացած թանկարժեք մետաղների ջարդոնի ու թափոնի ընդունման, դրանց վերամշակման, զտման կազմակերպմամբ և արտադրված թանկարժեք մետաղների ՀՀ պետական պահուստներում հաշվեգրմամբ, օրենքով սահմանված կարգով բնակչությունից թանկարժեք մետաղների, ինչպես նաև դրանցից պատրաստված իրերի ջարդոնների, թանկարժեք մետաղների և թանկարժեք քարերի հազվագյուտ բնակտորների, թանկարժեք մետաղներից և թանկարժեք քարերից պատրաստված բարձր գեղարվեստական պատմամշակութային արժեք ներկայացնող իրերի գնումների կազմակերպմամբ և իրականացմամբ և այլ միջոցներով: