Արմինե Գևորգյան. Նամակ «Ավրորայի» հերոսին
ՇՆՈՐՀԱԿԱԼՈՒԹՅՈՒՆ … ՈՒզում եմ հենց այս բառով էլ սկսել նամակս, Հարգելի՛ Թոմ Քաթինա: Ես կարդացի ձեր պատմությունը, որը ինձ վրա մեծ տպավորություն թողեց: Դուք անում եք այն, ինչի մասին շատերը նույնիսկ չէին էլ համարձակվի մտածել: Բայց մենք հաջողակ ենք, քանի որ աշխարհում մնացել են այնպիսի մարդիկ, ովքեր կարող են փոխել աշխարհը: Այո, այո… ամբողջ աշխարհը: Սիրելի Թոմ Քաթինա, դուք բուժում եք կանանց, տղամարդկանց, երեխաներին, բոլորին անխտիր` անկախ սեռից, տարիքից և ռասսայից: Մի՞թե սա չէր պատվիրում Աստված. սիրել միմյանց: Նա այս ասելիս չի նշել ոչ մի առանձնահատկություն,ազգ կամ կրոն: Մարդիկ թշնամությամբ են լցված միմյանց հանդեպ ու քչերն են փորձում հասկանալ իրական պատճառները: Այս ամենը հետևանք են էգոիստության, եսասիրության, անհանդուրժողականության, փառքի հասնելու մեծ ցանկության և նման այլ բաների, որ շատերս էլ քաջ գիտակցում ենք: Բայց մի՞թե չենք կարող խաղաղեցնել այս ամենը: Եթե բոլորը մտածեին ձեզ պես և առանց ինչ-որ շահի աջակցեին միմյանց, ապա աշխարհում էլ չէր լսվի ոչ մի լաց և ոչ մի տրտունջ: Սիրելի Թոմ Քաթինա, դուք օգնում եք մարդկանց ոչ միայն ֆիզիկապես, այլ նաև հոգեպես, դուք ոգեշնչում և ստիպում եք բոլորին լցվել սիրով ու համբերությամբ: Շնորհակալ եմ, քանի որ դուք ձեր այս քայլերով բուժում և լուսավորում եք միլիոնավոր մարդկանց հոգիները: