Քննչական մարմինն ու դատախազությունը լռության են մատնել Ներսես Պողոսյանի պահանջը
Փաստաբան Արայիկ Պապիկյանի խոսքով՝ ստեղծված վիճակում, երբ ամեն ժամն է ի վնաս Ներսես Պողոսյանի առողջությանը, անհեթեթ է սպասել, թե արդյոք վճռաբեկ դատարանը կընդունի իրենց դիմումը․ - «Վճռաբեկ դատարանը լավագույն դեպքում մեկ ամսվա մեջ եթե քննարկի, ևս մեկ ամիս անձը մնա հացադուլի պայմաններում, կարծում եմ, որ շատ ծանր հետևանքներ կարող է ունենալ: Իրավական ամենադյուրին կամ ամենակարճ ճանապարհը, բնականաբար, հենց վարույթն իրականացնող մարմնի կողմից խափանման միջոցը փոխելու վերաբերյալ որոշում կայացնելն է՝ ստորագրություն չհեռանալու մասին կամ որևէ այլ կերպ»:
Փաստաբանը համոզված է, որ բացի այն, որ կալանքն ապօրինի է, իրավապահները նաև մարդասիրություն չեն ցուցաբերում․ 37-ամյա Ներսեսի խնամքին երեք անչափահաս զավակներն ու վատառողջ մայրն են․ - «Ընտանիքը գոյատևում է Ներսես Պողոսյանի կալանավորումից հետո ընտանեկան նպաստով: Երեք փոքրահասակ երեխաների հնարավոր չէ ներկայումս ապահովել որևէ կերպ»:
Երեք երեխաների հոգսն այժմ Ներսես Պողոսյանի կնոջ՝ Լիայի ուսերին է․ - «Ոչ թե դժվար է, այլ արդեն անհնարին է: Եթե առաջին ամիսներին ինչ-որ հույս ունեինք՝ իմանալով, որ ինքը անմեղ է, նախաքննությունը գոնե կավարտվի ու ինչ-որ լուծում կստանա իր ազատ արձակվելը, հիմա արդեն անհնարին է դարձել այս հոգեկան բեռի հետ մեկտեղ, երեխաներին էլ․․․ Ուղղակի անհնար է»:
Կնոջ փոխանցմամբ, Ներսեսի մտադրությունը բողոքի ծայրահեղ այս միջոցն ավելի կոշտացնել՝ անցնելով նաև ջրադուլի, դատախազության և քննչական մարմնի անտարբերության պատճառով են․ - «Բողոքի ակցիային ոչ մի պատկան մարմին չարձագանքեց, բացի Արդարադատության նախարարության մերկապարանոց հայտարարությունից և Մարդու իրավունքների պաշտպանի գրասենյակից, որոնք ուղղակի այցելել էին նրան: Պահանջները․․․ ոչ մի արձագանք չկա»:
Արձագանքելով փաստաբանի դիմումին՝ Արդարադատության նախարարությունը հայտարարել էր․ «Հայաստանի Հանրապետութունում արդարադատությունն իրականացնում են դատարանները` Սահմանադրությանը և օրենքներին համապատասխան»:
Ներսես Պողոսյանն ավելի քան յոթ ամիս ճաղերի հետևում է Ժիրայր Սեֆիլյանի գործով՝ կազմակերպված խմբի կողմից ապօրինի զենք-զինամթերք կրելը, փոխադրելը, պահելը: Նա Սեֆիլյանի գլխավորած «Հիմնադիր խորհրդարան»-ի անդամ չէ, պնդում է, որ անձամբ չի էլ ճանաչում ընդդիմադիր գործչին: Փոխարենը ակտիվ մասնակցել է «Էլեկտրիկ Երևան»-ի ցույցերին:
«Միտք են ունեցել խումբ ստեղծել: Ստեղծել․ այդպես եմ ասում, որովհետև բազմաթիվ բացեր կան այդ քրեական գործում, զգացվում է, որ սարքած գործ է: Իրեն էլ, որպես աչքի ընկնող, երևի ներառել են», - ասաց Ներսեսի կինը:
«Ներսես Պողոսյանը Ժիրայր Սեֆիլյանին ճանաչում է այնքանով, որքանով հանրության շատ անդամներ մամուլից, հեռուստատեսությունից, համացանցից կամ որևէ հանրահավաքից: Այսինքն երբևէ իրենք շփումներ կամ առնչություն չեն ունեցել: Պատկան մարմինները, կարծեք թե, ավելի շատ գտնվում են քաղաքական ճնշումների տակ, քան [միտված են] իրավական հարթությունում խնդիրը լուծելու, և Ներսես Պողոսյանը դարձել է այդ քաղաքականության զոհը», - հավելեց փաստաբանը:
Ներսես Պողոսյանին փաստաբանը տեսակցել է երեկ․ հանդիպումն ընդամենը մի քանի րոպե է տևել․ - «Շատ հյուծված էր, գունատված: Նույնիսկ այնքան վատ էր իր վիճակը, որ մենք երկար չկարողացանք զրուցել, որովհետև զգում էի, որ ինքը հանգստանալու կարիք ունի: Չնայած չգիտեմ, թե նման պայմաններում ինչ է նշանակում հանգստանալ»: