(Казан, 19 апрель, «Татар-информ»). Бөтен Россия буенча «Үлемсез полк» акциясендә катнашуга гаризалар кабул ителә башлады, ул онлайн узачак. Мондый формат икенче тапкыр үткәреләчәк. Һәр төбәк үз трансляциясен алачак. Бу хакта тематик матбугат конференциясендә «Россиянең үлемсез полкы» Гомумроссия гражданлык-патриотик хәрәкәтенең Үзәк штабы рәистәше Елена Цунаева хәбәр итте. «Барлык фикерләрне анализлап, без „Үлемсез полк“ акциясе онлайнын дәвам итәргә кирәк, дигән нәтиҗә ясадык. Гаризалар инде бүген үк бирелә башлады. Без технологик алымны үзгәрттек. Хәзер без төбәкләр арасында хәрәкәт агымнарын билгелибез. Барлык трансляцияләр дә бер көнне, 9 майда узачак. Һәр субъект үз трансляциясен алачак, анда аларның якташлары гына булачак», — диде спикер. Аның сүзләренчә, узган ел акциядә 3 млн кеше катнашкан, бу оештыручылар көткәннән күп тапкыр артып киткән, шуның аркасында хәрәкәт трансляциясе 20 көн тәшкил иткән. Шуңа күрә быел һәр төбәк өчен үз трансляциясен ясарга булдык. Алар барысы да 9 майда үзләрендәге вакыт белән 15: 00 сәгатьтә башлана. Гариза бирү кампаниясе бүген сайтта башланды. Шул ук вакытта, әгәр кеше узган елдагы кебек үк гариза җибәрергә тели икән, аңа анкетада күрсәтергә генә кирәк, ул чакта ул автомат рәвештә узган елгы мәгълүматлардан алына, дип өстәде Цунаева. Моннан тыш, «Үлемсез полк» онлайнга эләгәчәк барлык мәгълүматлар, узган елдагы кебек акциягә катнашы булмаган фотолар булмасын өчен, алдан тикшерү узачак, дип өстәде «Россиянең үлемсез полкы» Гомумроссия иҗтимагый-патриотик хәрәкәтенең Үзәк штабы рәистәше Сергей Макаров. «Үлемсез полк»ның ачык чарасы бөтен Россия буенча 24 июньдә узачак, бу хакта элегрәк «Татар-информ» хәбәр иткән иде.
