ریپبلېکن ورډ کام: "افغانستان وړه ګوله نه ده چې پاکستان دې تر ستوني تېر کړي"
نیویارک ټایمز د افغان ښځینه څارنوالانو او قاضیانو په اړه لیکنه خپره کړې ده.
د دې لیکنې په سر کې راغلي، هغه افغان ښځې چې مخکې یې د جرمونو او سرغړونو په اړه قضاوت کاوه اوس د خپل ژوند وېره لري.
د ورځپاڼې له مخې، افغان ښځینه څارنوالانې او قاضیانې بېره لري چې دوی یا د دوی د کورنۍ غړي به ونیول شي او په دې خاطر به ووژل شي چې ښځو ته یې عدالت غوښت.
دوی وايي چې هر څه یې له لاسه ورکړي، وظیفه، کورونه او د ژوند طریقه.
ورځپاڼې د ښځینه قاضیانو د نړیوالې ټولنې پر اساس لیکلي، تر ۲۰۰ ډېرې افغان قاضیانې لاهم په افغانستان کې پاتې دي چې اکثره یې له تهدید سره مخامخ دي.
نیویارک ټایمز د امریکايي مدافع وکیلې کیمبرلي ماتلي په قول لیکلي چې افغانستان د هغو ښځو لپاره چې کلونه یې کار کړی دی، یو سرخلاصی زندان دی.
ریپبلیکن ورډ کام
ریپبلیکن ورډ کام کابل ته د پاکستان د بهرنیو چارو وزیر پر سفر د افغانستان د ولسمشر د پخواني مرستیال امرالله صالح غبرګون خپور کړی دی.
د خپرونې پر اساس صالح ویلي، افغانستان دومره وړه ګوله نه ده چې پاکستان دې یې په اسانه تر ستوني تېره کړي.
صالح په افغانستان کې د طالبانو نژدې دوه نیم میاشتنی حکومت د پاکستان له لوري د افغانستان اشغال بللی دی.
صالح په عین حال کې په ټولو برخو کې مقاومت د ده په وینا د افغانانو د عزت او د افغانستان د اشغال د پای ته رسېدو حللار بللې ده.
ډي ویک خپرونه
ډي ویک خپرونې د یوې افغان اشپزې په اړه لیکنه خپره کړې چې امریکا ته د تازه ورغلیو پناه غوښتونکو افغانانو ته وطني ډوډۍ پخوي.
لیلا میر چې په افغانستان کې زېږېدلې او لویه شوې وايي چې د امریکا په سان فرانسیسکو بې سیمه کې خپلو تازه ورغلیو افغانانو ته افغاني ډوډۍ پخوي.
دا په نهه کلنۍ کې امریکا ته تللې او د خپلې کورنۍ د نورو غړیو په مرسته یې پخلی زده کړی او افغاني خواړه انلاین پلوري.
د دې ډېری مشتریان مهاجر دي په تېره بیا هغوی چې د دې د استوګنې په شااوخوا سیمو کې اوسي.
په وروستیو څو اوونیو کې لیلا میر سلګونه خوراکه نوېو راغلیو کډوالو ته وړیا ورکړي دي.