Израел изврши бран воздушни напади врз Либан, 11 лица загинаа

Израел го започна својот најголем бран воздушни напади низ Либан откако се согласи на прекин на огнот со Хезболах минатата недела, убивајќи најмалку 11 лица во понеделникот (3 декември) откако либанската милитантна група истрела низа проектили како предупредување против, како што рече, израелското прекршување на примирјето.


Ова е првпат Хезболах да ги нападне израелските сили откако минатата недела стапи во сила прекин на огнот.


Кревкото примирје со посредство на Соединетите Држави и Франција повикува на 60-дневен прекин на огнот со цел да се стави крај на повеќе од една година војна меѓу Хезболах и Израел, дел од поширокиот регионален конфликт предизвикан од разорната војна на Израел во Појасот Газа против Хамас. САД и ЕУ ја окарактеризираа Хамас за терористичка организација.


И Хезболах се наоѓа на американската листа на терористички организации, додека на црната листа на ЕУ е само нејзиното вооружено крило, но не и политичката партија која е застапена во либанскиот парламент.


Израелската војска во понеделникот соопшти дека извршила напади врз терористички цели во Либан, откако Израел и либанското радикално движење Хезболах разменија обвинувања за прекршување на примирјето.


Претходно, Хезболах пукаше во спорната гранична зона што ја држеше Израел по повеќекратните израелски напади во Либан откако стапи во сила прекин на огнот.


Иако прекинот на огнот во голема мера ги запре борбите, Израел изврши напади врз цели во последните денови, тврдејќи дека тоа е одговор на прекршување на договорот.




Хезболах рече дека нивниот напад, прв од почетокот на примирјето, бил предупредување и одговор на, како што рече, повеќекратните израелски прекршувања на прекинот на огнот.

Либанското Министерство за здравство соопшти дека пет лица загинале, а две се ранети во израелски воздушен напад врз јужното село Харис. Во вториот воздушен напад врз селото Талуса загинаа четири лица, а двајца беа ранети.


Пред ракетата на Хезболах, Израелците извршиле најмалку четири воздушни напади во јужен Либан, вклучително и напад со беспилотно летало во кој загина човек на мотор, објавија либанските државни медиуми. Во вториот напад, убиен е припадник на либанските безбедносни служби.


Претседателот на либанскиот парламент, Набих Бери, го обвини Израел дека го прекршил прекинот на огнот повеќе од 50 пати во изминатите неколку дена со воздушни напади, уривање куќи во близина на границата и кршење на либанскиот воздушен простор.


Според договорот, Хезболах поддржан од Иран има 60 дена да ги повлече своите борци и инфраструктура од јужен Либан. За тоа време, израелските војници исто така треба да се повлечат на нивната страна од границата.