ვოლსკის თქმით, არ არსებობს საკითხი, რაზეც ზურაბიშვილს შეუძლია აზერბაიჯანის პრეზიდენტს ესაუბროს
საქართველოს პარლამენტის პირველი ვიცე-სპიკერი გია ვოლსკი აცხადებს, რომ პრეზიდენტს ქვეყნის კონსტიტუცია არ აძლევს შესაძლებლობას, სხვა ქვეყნის მმართველ პირებთან "საქმეების, საკითხების, შეთანხმების თემა წამოწიოს". გია ვოლსკიმ სალომე ზურაბიშვილი გააკრიტიკა ილჰამ ალიევის მოწვევის გამოც.
"მე ვერ ვხედავ ამ თემაზე ამდენი ლაპარაკის აუცილებლობას. მე ვიცი, რომ საგანგებო მნიშვნელობის საკითხები ჰქონდა. არ ვიცი, საგანგებოზე მეტი რა ვთქვა. არ მგონია, რომ ამ ვიზიტის თემა უნდა გადაიფაროს იმით, შეხვდა თუ არა საქართველოს პრეზიდენტს, რომელსაც არ აქვს კონსტიტუციით ის უფლებამოსილებები, რომ მაინცდამაინც ეს შეხვედრა შემდგარიყო...
ან მოწვევა ცალკე რა არის? საერთოდ, რომ იწვევ პრეზიდენტს ან პრემიერ-მინისტრს, პრეზიდენტს, საგარეო საქმეთა მინისტრს, პარლამენტის თავმჯდომარეს, რასაკვირველია, იქ საკითხების წრესაც განსაზღვრავ და არ არის ის საკითხების წრე, არ არსებობს, რომელზეც შეიძლება, სალომე ზურაბიშვილმა, თუნდაც, აზერბაიჯანის პრეზიდენტთან ისაუბროს - საქმეების, საკითხების, შეთანხმების თემა წამოწიოს, როდესაც მისთვის ეს კონსტიტუციით არ არის განსაზღვრული", - თქვა გია ვოლსკიმ "პალიტრანიუსის" ეთერში.
მანვე აღნიშნა, რომ პრეზიდენტს თავშეკავება მართებს და "აბსოლუტურად არ იყო საჭირო ამ თემაზე [ამხელა ამბის ატეხა]".
"მე არ მგონია, რომ გერმანიის პრეზიდენტი გამოვიდეს და როდესაც სახელმწიფოში ვიზიტია რომელიმე ქვეყნის მეთაურის, მასთან არშეხვედრის გამო დიდი ემოცია გამოხატოს ამასთან დაკავშირებით. სხვა კომენტარი არა მაქვს. წინასწარ იცოდა, არ იცოდა, ახლა ეს თემა მე... ბევრი საკითხებია ისეთი, რაზეც სალომე ზურაბიშვილმა უადგილო პრეტენზია გამოაცხადა...
ამგვარი [ურთიერთობები] უხერხულობებს ქმნის და სალომე ზურაბიშვილიც ბოლო პერიოდში ამ უხერხულობების შექმნის მიმართებით..." - ამბობს პარლამენტის პირველი ვიცე-სპიკერი.
24 ოქტომბერს საქართველოს პრეზიდენტის ადმინისტრაციამ აზერბაიჯანის პრეზიდენტის საქართველოში ვიზიტთან დაკავშირებით განცხადება გაავრცელა და აღნიშნა, რომ ილჰამ ალიევის ვიზიტის შესახებ სალომე ზურაბიშვილი ინფორმირებული არ ყოფილა.
"საკითხის მნიშვნელობიდან გამომდინარე, საქართველოს პრეზიდენტის ადმინისტრაცია მიზანშეწონილად მიიჩნევს საზოგადოებას აცნობოს, რომ პრეზიდენტი არ ყოფილა ინფორმირებული ჩვენი მეზობელი და მეგობარი ქვეყნის პრეზიდენტის, ბატონი ილჰამ ალიევის საქართველოში სამუშაო ვიზიტის შესახებ", - ეწერა განცხადებაში.