IAEA უკრაინაში შეამოწმებს ობიექტებს, სადაც რუსეთის მტკიცებით, "ბინძურ ბომბებს" ამზადებენ
ატომური ენერგიის საერთაშორისო სააგენტოს(IAEA) ექსპერტები უახლოეს დღეებში ჩავლენ უკრაინაში, რომელსაც რუსეთი ბრალს სდებს ე.წ. ბინძური ბომბის გამოყენებით პროვოკაციის მზადებაში. უკრაინამ, რომელიც რუსეთს ბრალდებას კატეგორიულად უარყოფს და ბირთვულ შანტაჟად აფასებს, სააგენტოს ექსპერტები 24 ოქტომბერს მიიწვია.
ატომური ენერგიის საერთაშორისო სააგენტოს დირექტორის, რაფაელ მარიანო გროსის განცხადებით, უკრაინაში მდებარე ორივე ობიექტი, სადაც რუსეთის თანახმად, შესაძლოა, გარკვეული საქმიანობა მიმდინარეობდეს, სააგენტოს დაცვის ქვეშაა და ამ ობიექტებს ინსპექტორები რეგულარულად ამოწმებენ. გროსი კონკრეტულ ობიექტებს არ ასახელებს.
სააგენტოს დირექტორის ინფორმაციით, ერთ-ერთი ობიექტი ერთი თვის წინაც შეამოწმეს და მათი დასკვნა სრულად შეესაბამება უკრაინის მიერ დეკლარირებულ გარანტიებს. რაფაელ მარიანო გროსის თანახმად, ინსპექტორებს ამ ობიექტზე არ აღმოუჩენიათ არანაირი არადეკლარირებული საქმიანობა, ან ბირთვული მასალები.
23 ოქტომბერს, როცა რუსეთის თავდაცვის სამინისტრომ განაცხადა, რომ უკრაინა შესაძლოა, პროვოკაციას ამზადებდეს ე.წ. ბინძური ბომბის გამოყენებით, კრემლის მიერ კონტროლირებული მედიასაშუალებები ჩერნობილის დახურულ ატომურ ელექტროსადგურს და კიევსა და ხარკოვში მდებარე სამეცნიერო ცენტრებს ასახელებდნენ სავარაუდო ადგილებად, სადაც „ბინძურ ბომბებს“ ამზადებენ.
24 ოქტომბერს, რუსეთის შეიარაღებული ძალების რადიაციული, ქიმიური და ბიოლოგიური დაცვის ჯარების მეთაურმა, გენერალმა იგორ კირილოვმა განაცხადა, რომ "ბინძური ბომბის" შექმნა დავალებული აქვს ორ ორგანიზაციას და მუშაობა ბოლო სტადიაზეა. კონკრეტულად რომელ ორგანიზაციებს, რუს გენერალს არ უთქვამს, თუმცა, დაამატა, რომ უკრაინაში არსებობს ბირთვული მრეწველობის ობიექტები, რომლებსაც აქვთ რადიოაქტიური მასალები და ეს ობიექტებია სამხრეთ უკრაინის, ხმელნიცკის და როვნოს ატომური ელექტროსადგურები და ჩერნობილის დახურული სადგური, რომლის საცავებში ინახება რადიოაქტიური ნარჩენები.
მას შემდეგ, რაც 23 ოქტომბერს, რუსეთის თავდაცვის მინისტრმა თურქეთის, საფრანგეთის, დიდი ბრიტანეთის და აშშ-ის თავდაცვის მინისტრებს დაურეკა და უკრაინის მიერ "ბინძური ბომბის" შესაძლო გამოყენებაზე ელაპარაკა, აშშ-მა, დიდმა ბრიტანეთმა და საფრანგეთმა განაცხადეს, რომ უარყოფენ რუსეთის აშკარად ცრუ მტკიცებას, თითქოს, უკრაინა თავის ტერიტორიაზე აპირებს „ბინძური ბომბის“ გამოყენებას.
"ბინძურ ბომბს" უწოდებენ ასაფეთქებელ მოწყობილობას, რომელიც რადიოაქტიურ ნივთიერებებსაც შეიცავს. უკრაინა არ გამორიცხავს, რომ რუსეთი თავად აპირებს ამ ტიპის შეიარაღების გამოყენებას, რასაც შემდეგ კიევს დააბრალებს.