ლევან ალაფიშვილი: შესაძლოა, მმართველმა გუნდმა გაზაფხულზე აპრობირებული „ძველი თამაში“, გაიხსენოს და საკონსტიტუციო ცვლილების არშესრულებისთვის „საპარლამენტო ბუნტი“ გაათამაშოს
საშინაო და საგარეო პოლიტიკის აქტუალურ საკითხებზე “ინტერპრესნიუსი“ იურისტს, აღმოსავლეთ ევროპის უნივერსიტეტის პედაგოგს, ლევან ალაფიშვილს ესაუბრა.
– ბატონო ლევან, მმართველი გუნდი და ოპოზიცია კი აცხადებენ, რომ ევროპული რეკომენდაციების შესრულება ჩვენი საშინაო და საგარეო პოლიტიკის პრიორიტეტული საკითხებია, მაგრამ, მას შემდეგ, რაც პარლამენტმა მუშაობა დაიწყო, საკანონმდებლო ორგანოში ამ თემაზე მუშაობა აშკარად არ ტოვებს განცდას, რომ რეკომენდაციების შესასრულებლად რეალური ნაბიჯები იდგმება.
საქმეში ჩახედული ადამიანების მტკიცებით, 12 –დან არც ერთ რეკომენდაციაზე მუშაობა არ დასრულებულა, სამ რეკომენდაციაზე მუშაობა ჯერ არც დაწყებულა. არადა, ფაქტია, რომ რეკომენდაციების შესრულებაზე მთავარი პასუხისმგებელი ხელისუფლებაა.
თქვენ როგორ შეაფასებდით 12 ევროპული რეკომენდაციების შესრულებასთან დაკავშირებით პარლამენტში მიმდინარე პროცესს?
– თორმეტივე ევროპული რეკომენდაცია თავისი შინაარსით საკმაოდ მასშტაბური ცვლილებების განხორციელებას გულისხმობს. ფუჭია მოლოდინი იმისა, იმ პოლიტიკური კულტურის პირობებში, რაც ჩვენთანაა, დღევანდელ პარლამენტში წარმოდგენილი პოლიტიკური ძალების გამოცდილების, ერთმანეთთან ურთიერთობის გამოცდილების გათვალისწინებით მოკლე პერიოდში შეიძლება გვქონდეს ევროპული რეკომენდაციების შესრულების იმედი.
ყველაფერ ამის გათვალისწინებით, სამწუხაროდ, ჩვენი ევროპელი მეგობრების რეკომენდაციები წლის ბოლომდე ვერ შესრულდება. თუ ამ თემაზე ჩვენი ევროპელი პარტნიორების განცხადებებს მივადევნებთ თვალს, ვნახავთ, რომ ამის მოლოდინი არც ჩვენ ევროპელ პარტნიორებს არ აქვთ.
სამწუხაროდ, ჩვენი ევროპელი მეგობრების რეკომენდაციები წლის ბოლომდე ვერ შესრულდება… ამის მოლოდინი არც ჩვენ ევროპელ პარტნიორებს არ აქვთ
მაგრამ, ამის პარალელურად მათ გამოთქვეს იმედი, რომ რეკომენდაციებთან დაკავშირებით პოლიტიკური ძალები დიალოგს გააღრმავებენ და ამ პროცესს შეუქცევადს გახდიან და სახელმწიფოებრივ საკითხებზე კონსენსუს მიაღწევენ. მათივე თქმით, ჩვენი ევროპელი პარტნიორებისთვის ესეც საკმარისი იქნება.
– შესაძლოა, ეს განცხადებები იმასაც ნიშნავს, რომ ამ ეტაპზე ისინი ახლა ამას ვერ ხედავენ?
– სავარაუდოა, რომ ამას ვერ ხედავენ, რადგან, როგორც წესი, ასეთ განცხადებებს ევროპელი პოლიტიკოსები არ აკეთებენ ხოლმე. ფაქტია, რომ ევროპელებმა გასაგები სიგნალი მოგვაწვდინეს. შესაძლოა, 12-ვე რეკომენდაცია ვერ შევასრულოთ იმ დონეზე და იმ ხარისხით, როგორც ისინი ითხოვენ და მათ ამის ბევრი ობიექტური და სუბიექტური მიზეზი იციან.
მაგრამ, ეს სულაც არ ნიშნავს იმას, რომ ჩვენმა პოლიტიკურმა ძალებმა პროცესი არ დაიწყონ ერთობლივად და მათ შორის დიალოგი არ იყოს. ჩვენი ევროპელი პარტნიორები ჩვენი პოლიტიკოსებისგან დიალოგის დაწყებას ითხოვენ არა პარტიული, არამედ სახელმწიფოებრივად მნიშვნელოვან თემებზე.