სტიქიამ კახეთში დააზარალა ათეულობით ოჯახი
ძლიერმა ქარმა, წვიმამ და სეტყვამ სერიოზული ზიანი მიაყენა ათეულობით ოჯახს ლაგოდეხის მუნიციპალიტეტის სოფელ მსხალგორში.
რადიო თავისუფლების კორესპონდენტის ცნობით, დატბორილია საცხოვრებელი სახლების პირველი სართულები და დაზიანებულია ავეჯი და საყოფაცხოვრებო ტექნიკა.
განადგურებულია ვენახები და ერთწლიანი კულტურები. მოგლეჯილია მრავალწლოვანი ნარგავები. დაიხოცა შინაური ფრინველიც. სტიქიის გამო მსხალგორს შეუწყდა ელექტროენერგიის და ბუნებრივი გაზის მიწოდება.
სოფლის მცხოვრებნი პასუხისმგებლობას ადგილობრივ ხელისუფლებას აკისრებენ, რადგან მათი განცხადებით, სანიაღვრე არხები გაწმენდილი რომ ყოფილიყო, არ დაზარალდებოდნენ. მსხალგორის მოსახლეობა დახმარებას ითხოვს.