Мозамбикта Россия илчесе Александр Суриков вафат булган
Россиянең Мозамбиктагы илчесе Александр Суриков Мапутуда кинәт вафат булган. Бу хакта РФ Тышкы эшләр министрлыгында хәбәр иткәннәр.
«РИА Новости» мәгълүматлары буенча, дипломатның үлеменә инсульт сәбәпче булган.
«Якын арада ведомство рәсми некролог урнаштырачак», – дип хәбәр иткәннәр агентлыкка РФ Тышкы эшләр министрлыгында.
Александр Суриков 1956 елда туган. 1978 елда СССР Тышкы эшләр министрлыгының Мәскәү дәүләт халыкара мөнәсәбәтләр институтын (МГИМО) тәмамлаган. Икътисад фәннәре кандидаты инглиз, испан һәм португал телләрен белгән. 1978 елдан дипломатик эштә булган.