Новости за 25.05.2024

Актанышта Әлфия Авзалова исемендәге район мәдәният сараенда «Олимпка юл», республика, төбәкара, халыкара һәм Бөтенроссия фән олимпиадаларында җиңүчеләрне хөрмәтләү тантанасы узды. Бу хакта «Актаныш» сайтында Ләйсән Газизова яза.

Быел Чирмешәннең 1нче урта мәктәбе 87нче чыгарылышы белән хушлашты, «Соңгы кыңгырау» унберенче сыйныфны тәмамлаучы 7 укучы өчен яңгырады. Бу хакта «Безнең Чирмешән» сайтында Кадрия Гамирова яза.

Апас районы башлыгы Айрат Җиһаншин, «Опора плюс» җәмгыяте генераль директоры Евгений Баландин һәм эксперт-укытучылар составындагы комиссия «электр җиһазларын ремонтлау һәм хезмәт күрсәтү буенча электромонтер» һөнәрен үзләштерүче 2 курс студентларыннан имтихан алды. Бу хакта «Апастово-информ» сайтында Ләйлә Шиһабиева хәбәр итә.

Апрель аенда Казан дәүләт мәдәният институтында инвалидлыгы булган балалар һәм укытучы-остазларның V Бөтендөнья фестивале-конкурсы финалистлары ярыша һәм җиңүчеләрнең Гала-концерты үтә. Әлеге бәйгедә Әлки районы кызы – Базарлы Матак мәктәбенең 4 сыйныф укучысы Әминә Исхакова да катнашып, призер була. Бу хакта «Әлки хәбәрләре» сайтында Алсу Закирова яза.

19 июньдә Сергач шәһәре үзәк мәйданында Татарстанның халык, Россиянең атказанган артисты Хәйдәр Бигичевның 75 еллыгы һәм якты истәлегенә багышланган зур хәйрия концерты узачак. Бу хакта Бөтендөнья татар конгрессы «Туган як» газетасы редакциясе хәбәренә сылтама белән хәбәр итә.

Казан май аенда ялгыз ял итү өчен популяр булган юнәлешләр рейтингының алтынчы баскычында урнашкан. Туристлар ТР башкаласында уртача өч төнгә туктала. Бу хакта Казан мэриясе матбугат хезмәте хәбәр итә.

Татарстан Республикасы Рәисе Рөстәм Миңнеханов республика балалар лагерьләренә персоналны җентекләп җыярга чакырды. Барлык хезмәткәрләр дә медицина тикшерүе узарга һәм тиешле квалификациягә ия булырга тиеш, дип белдерде республика җитәкчесе ТР Хөкүмәте йортында узган киңәшмәдә.

Дәүләт Советында «Татарстан Республикасы парламент дебатлары — 2024» конкурсына йомгак ясадылар. Финалга республиканың төрле районнарыннан 48 команда үтте, дип хәбәр итә Татарстан парламентының матбугат хезмәте.

Казан Кремлендә бу сезонда ил чемпионаты һәм кубогында җиңү яулаган «Синтез» су полосы командасын хөрмәтләү тантанасы узды. Спортчыларны чираттагы титулга ия булулары белән Татарстан Республикасы Рәисе Рөстәм Миңнеханов котлады.

Россиядә махсус хәрби операциядә катнашучылар өчен ташламаларны киңәйтергә планлаштыралар. Әйтик, алар өчен ипотека буенча процентларны «туңдырып торырга», җир кишәрлекләрен бүлеп бирү кагыйдәләрен төгәл билгеләргә тәкъдим ителә. Россия Президенты Владимир Путинга бу хакта докладны махсус хәрби операция мәсьәләләре буенча эшче төркем җибәрде, дип хәбәр итә «Бердәм Россия» Бөтенроссия сәяси партиясенең Татарстан төбәк бүлеге матбугат хезмәте.

Татарстан Республикасы Хөкүмәте йортында узган киңәшмәдә республиканың авыл хуҗалыгы һәм азык-төлек министры Марат Җаббаров Татарстанда чәчү эшләре барышы турында сөйләде.

2024 елның беренче кварталы йомгаклары буенча Татарстан авыл хуҗалыгында уртача айлык хезмәт хакы 47 924 сумга җиткән. 2023 ел күрсәткечләре белән чагыштырганда ул 24 процентка арткан, дип белдерде Татарстан Республикасы Хөкүмәте йортында узган киңәшмәдә республиканың авыл хуҗалыгы һәм азык-төлек министрлыгы башлыгы Марат Җәббаров.

Махсус хәрби операциянең беренче көннәреннән үк ТР Минзәлә районы халкы ни дәрәҗәдә ярдәмчел була алуын исбатлады.

Ел башыннан Татарстанда 1,918 миллион квадрат метр торак, ягъни планлаштырылган күләмнең 61 проценты файдалануга тапшырылган. Бу хакта бүген ТР Хөкүмәте йортында узган киңәшмәдә ТР төзелеш министры Марат Айзатуллин хәбәр итте.

24 майда Баулы районы Салих авылында «Нәҗметдин» исемле яңа мәчет ачылу тантанасы булып узды. Әлеге күркәм чараны хөрмәтләп, күпләгән кунаклар кайтты, тантанага районның дин һәм җәмәгать эшлеклеләре, авыл халкы җыелды. Гыйбадәт йорты мөхтәсибәттә 16нчы булып үз ишекләрен ачты. Бу хакта ТР Диния нәзарәте матбугат хезмәте хәбәр итә.

Татарстан Рәисе Рөстәм Миңнеханов республикада халык бәйрәмнәре башлануын искәртте. Алар иртәгә, 26 майда, Лаеш районында рус халык бәйрәме Каравон белән башланып китәчәк. Бу хакта ТР җитәкчесенең матбугат хезмәте хәбәр итә.

Татарстанда төп капиталга инвестицияләр күләменең 2030 елга кадәр көтелгән артуы 10 процентка кимегән. 2020 ел күрсәткечләре белән чагыштырганда ул 60 процентны тәшкил итәргә тиеш. Бу ТР Рәисе Рөстәм Миңнеханов указыннан аңлашыла.

Татарстан Рәисе Рөстәм Миңнеханов җәйге сәламәтләндерү кампаниясе вакытында балаларның иминлегенә аерым игътибар бирергә кушты. Бу хакта ул ТР Хөкүмәте йортында узган шимбә киңәшмәсендә белдерде, дип хәбәр итә ТР җитәкчесенең матбугат хезмәте.

Быел көз Дәүләт Советына сайлау узачак. Алдан тавыш бирүдә катнашкан ДТРК «Татарстан»да «Парламент хәбәрләре» программасы җитәкчесе Дмитрий Второв үз теләк-хыяллары белән уртаклашты.

Татарстанда «Яшь дипломатлар / Youth Ambassadors 7.0» конкурсы тәмам. Бәйге җәмәгать дипломатиясе өлкәсендә талантлы яшьләрне ачыклау, өйрәтү һәм аларга ярдәм итү максатыннан үткәрелә. Бу хакта ТР Яшьләр министрлыгының матбугат хезмәте хәбәр итә.

Краснодарда начар һава торышы соңгы кыңгыраулар бәйрәм кәефен бозган. Шәһәр мэры Евгений Наумов хәбәр иткәнчә, көчле җил Рылеев урамындагы 29 номерлы мәктәп түбәсенә зыян китергән, дип хәбәр итә ТАСС.

Россиядә мобилизациянең яңа дулкынын үткәрү планлаштырылмый. Илдә мондый адымга ихтыяҗ юк, дип хәбәр иткән «РИА Новости»га Кремльнең рәсми вәкиле Дмитрий Песков.

«Пушкин картасы»ның функционалын китаплар сатып алу өчен киңәйтергә кирәк. «Россиянең әдәби флагманы» фестиваль-форумында ТР мәдәният министрлыгы башлыгы Ирада Әюпова шундый фикер белән уртаклашты.

Бүген, 25 майда, Татарстанга циклонның җылы секторы йогынтысы сәбәпле кыска вакытка җәйге эсселек килә. Бу хакта ТР Гидрометеорология үзәге хәбәр итә.

Татарстанда «Экология» илкүләм проекты «Урманнарны саклау» федераль проектының «Татарстан Республикасында урманнарны саклау» төбәк проекты кысаларында кайбер эшләр төгәлләнгән. Урман тармагы белгечләре 1412,1 гектар мәйданда (планлаштырылганнан 100 процент) – урманны ясалма юл белән тергезү, 4 гектарда (100 процент) – урманны катнаш ысул белән тергезү һәм 103,6 гектарда (100 процент) урман үрчетү эшләрен башкарган.