Татарстанда «Хезмәт батырлыгы предприятиеләре» саны 20гә җитте

Татарстанда «Хезмәт батырлыгы предприятиеләре» саны 20гә җитте. Республикада «Хезмәт батырлыгы предприятиесе. 1941-1945 еллар» дәрәҗәле исеменә Л.Я. Карпов исемендәге химия заводы һәм Кукмара киез итек комбинаты лаек булды.

«Быел республика өчен татарстанлыларның хезмәт батырлыгына багышланган стела ачылу мөһим вакыйга булачак. Стела ачылу вакытына республиканың 20 оешмасы «Хезмәт батырлыгы предприятиесе» дигән горур исем йөртәчәк. Нәкъ менә алар тылда эшләп, җиңү өчен фронтны барлык кирәкле әйберләр белән тәэмин иттеләр», – диде ТР вице-премьеры Ләйлә Фазлыева Татарстан Республикасы Министрлар Кабинетында узган брифингта.

Ул узган ел йомгаклары буенча республикада 18 «Хезмәт батырлыгы предприятиесе» исәпләнгәнен билгеләп үтте. Хәзерге вакытта хезмәт коллективларының бу исем бирүне сорап мөрәҗәгатьләре бар.

«Аналар хәтерен һәм республика үсешендә чагылыш тапкан вакыйгаларны мәңгеләштерү буенча комиссия эшли. Бөек Ватан сугышы елларында «Хезмәт батырлыгы предприятиеләре» керткән өлеш даими рәвештә комиссия контролендә тора. Бәйрәм алдыннан ике предприятие коллективы республика Рәисе адресына мөрәҗәгать итте», – дип сөйләде Фазлыева.

«Казан – хезмәт батырлыгы шәһәре» стеласы ачылышы 4 майда Җиңү көне алдыннан төп вакыйга булачак, дип өстәде Казан Башкарма комитетының мәдәният идарәсе башлыгы Азат Абзалов.

26 метр биеклектәге стела Казан-2 вокзалы скверы янындагы территориядә урнашкан. Биредә объектны ачу тантанасыннан соң «Хәтер бакчасы» акциясе узачак. Аның максаты - Бөек Ватан сугышында һәлак булганнар истәлегенә агачлар утырту.

«Хезмәт батырлыгы предприятиесе. 1941-1945 еллар» республика исемен булдыру турындагы указга ТР Рәисе Рөстәм Миңнеханов 2022 елның 12 апрелендә кул куйды. Яңа исем республика предприятиеләренең Бөек Ватан сугышында Җиңүгә керткән зур хезмәтен күрсәтергә мөмкинлек бирәчәк.