Казанның «Ярдәм» мәчетендә сәламәтлеге чикле кешеләр өчен беренче спорткомплекс ачылды

04.08.2022 16:05

Татарстан башкаласының "Ярдәм" мәчетендә сәламәтлеге чикле кешеләр өчен махсуслаштырылган беренче спорткомплекс ачылды. Комплекска җиһазларны чит илләрдән кайтарганнар. Бу турыда яңа бинаны ачу тантанасында Казан мэры Илсур Метшин хәбәр итте.

Илсур Метшин комплексның һәр бүлмәсен карады, спортчылар белән аралашып алды. Аның сөйләвенчә, бер ел элек «Ярдәм» фонды аңа мөрәҗәгать иткән булган. «Бүген мөмкинлекләре чикле кешеләр өчен чын спорт сәламәтләндерү комплексы барлыкка килде. Без дөньядагы иң яхшы тәҗрибәне җыйдык, Израильдән, Европадан иң яхшы җиһазлар кайтардык. Кешеләр биредә спорт белән генә түгел, профессиональ әзерлек белән дә шөгыльләнә ала», – диде Метшин. Аның сүзләренчә, 78 нче мәктәп базасында тагын бер спорт комплексы ясарга җыеналар.

Ачылу тантанасында «Ярдәм» мәчете Имам-хатыйбы Илдар хәзрәт Баязитов та катнашы. «Спорт үзәгендә барлыгы 25 махсус тренажер урнаштырылган. Алар барысы да мөмкинлекләре чикләнгән кешеләр өчен җайлаштырылган», – диде ул.

Спорт залында бер үк вакытта 40 кеше шөгыльләнә ала, барысы да бушлай. Комплексның беренче катында спорт залы һәм инвалид коляскаларда килүчеләр өчен тренировка кабинеты урнашкан. Зал флорбол (коляскадагы хоккей), бочче, футбол, мини-футбол, волейбол һәм баскетбол кебек паралимпия төрләре буенча күнегүләр үткәрергә мөмкинлек бирә. Көрәш өчен гимнастик маталар, киенү-чишенү бүлмәләре, сауна, ресепшн һәм сак пункты бар.

Комплексның икенче катында көч һәм кардиотренировкалар өчен заллар, массаж кабинеты һәм электр мускул стимуляциясе өчен җиһазлар булган кабинет урнашкан. Бүген бу залларда журналистлар өчен пресс-тур булды.

Спорт комплексы базасы паралимпия спортчылары өчен күнегүләр үткәрергә мөмкинлек бирә. Шушы көннәрдә Татарстанның бочче буенча паралимпия һәм теннис буенча җыелма командасы үз күнегүләрен үткәргән.

Әлеге чарада Казанда спорт тренеры булып эшләүче Россия җыелма командасының профессиональ спортчысы, алты тапкыр дөнья чемпионы Алексей Завалишин катнашты. «Бочче белән ун ел шөгыльләнәм. Польшада, Германиядә, Мәскәүдә булганым бар. Без атнага алты көн әзерләнәбез. Мин туганнан бирле балалар церебраль параличы белән авырыйм. Бочче ул - нәкъ менә безнең кебек кешеләр өчен», – диде Алексей Завалишин.

Алексей Завалишин

Фото: © Ралинә Заһидуллина

Бирегә килгән Альберт Абзалов 1994 елдан бирле коляскада. 9 ел буе инвалидлар арасында баскетбол белән шөгыльләнгән. Ул сәламәтлек мөмкинлекләре чикләнгән кешеләр өчен спорт объектлары инфраструктурасы үсешен уңай бәяли. «Соңгы ун ел эчендә прогресс бик зур. Бүген спорт объектлары һәр районда бар. Сәламәт кеше моны сизми, ә безнең кебекләр өчен бусага да зур проблема», – ди ул.

«Ярдәм» мәчетендә

Фото: © Ралинә Заһидуллина

Бүген спорт комплексында 8 тренер эшли. Аларның профильле белем һәм сәламәтлек мөмкинлекләре чикләнгән кешеләр белән эшләргә рөхсәт бирүче сертификатлары бар. Спорт директоры Александр Литвин быел ишетүләре чикләнгән илле яшьтән узган өч кешене велосипедта йөрергә өйрәтүе турында сөйләде. «Аю да велосипедта йөри бит әле», – диде ул.

Александр Литвин

Фото: © Ралинә Заһидуллина