Путин онлайн-тавыш бирүнең бердәм кагыйдәләрен кертү турында законны имзалады

(Казан, 14 март, «Татар-информ»). РФ Президенты Владимир Путин Россиядә дистанцион рәвештә электрон тавыш бирү үткәрүнең бердәм кагыйдәләрен кертү турындагы законга кул куйды. Документ хокукый мәгълүматның рәсми интернет-порталында урнаштырылган.

Яңа закон нигезендә, электрон тавыш бирү «Выборы» Дәүләт автоматлаштырылган системасында, сертификация узган һәм Үзәк сайлау комиссиясе таләпләренә туры килә торган башка мәгълүмат системаларында уздырылырга тиеш.

Электрон тавыш бирүдән файдалану турындагы карар Үзәк сайлау комиссиясе тарафыннан кабул ителәчәк. Бу федераль хакимият органнарына сайлауларда һәм референдумга кагыла. Шулай ук тавыш бирү көннәрен башка сайлаулар белән бергә кушу турындагы карарны да шушы ук орган кабул ителәчәк.

Моннан тыш, билгеле бер вакыт эчендә сайлану хокукы бирелми торган затлар исемлеге киңәйтелде. Аерым алганда, экстремистик дип танылган эшчәнлеге өчен хөкем ителүчеләрнең пассив сайлану хокукы чикләнә. Алар хөкем карары түләп бетерелгәннән соң яки суд хөкемен алганнан соң биш ел узгач кына сайлауларда катнаша ала.

Шулай ук сайлаучының үз карарын үзгәртү һәм кабат тавыш бирү мөмкинлеге дә бетерелә. Шулай ук дистанцион тавыш бирүдән файдалану мөмкинлеге алган сайлаучы сайлау участогында бюллетень алырга хокуклы түгел.

Закон шулай ук сайлау комиссияләре эше белән бәйле башка яңалыкларны да үз эченә ала.