Новости за 29.11.2023

Казанда Мәрҗани мәчете каршында Россия Федерациясенең атказанган, Татарстан Республикасының халык артисткасы, Татарстан Республикасының Габдулла Тукай исемендәге Дәүләт премиясе лауреаты Наилә Гәрәева белән хушлашу мәрасиме узды. Актрисаны соңгы юлга озатырга хезмәттәшләре, туганнары һәм тамашачылары, дәүләт эшлеклеләре җыелган иде.

ТР Министрлар Кабинеты 2024 елга Татарстан авылларында торакның бер квадрат метры бәясен раслады. Хокукый мәгълүмат порталында урнаштырылган карар нигезендә, киләсе елда бер квадрат метр бәясе 31,8 мең сум тәшкил итәчәк.

Татарстан Республикасында 2024 елга республика министрлыклары максатларын сайлау буенча онлайн-тавыш бирү дәвам итә. Анда 20 меңнән артык кеше катнашкан инде.

28 ноябрьдә Казанда «Татарстанның эшлекле хезмәттәшләре» XVI форумының пленар утырышы узды. Чараны Бөтендөнья татар конгрессы ТР Сәүдә-сәнәгать палатасы белән берлектә оештырды.

«Россия» Халыкара күргәзмә-форумында Республика көне алдыннан федераль телеканаллар Татарстан турында сюжетлар күрсәтәчәк. Әйтик, бүген «Мир 24» телеканалында киләсе елда Казанда узачак «Киләчәк уеннары» халыкара фиджитал-турнир турында сюжет чыкты.

2 декабрьдә Мәскәүдә, Халык хуҗалыгы казанышлары күргәзмәсе (ВДНХ) мәйданчыгындагы «Россия» Халыкара күргәзмә-форумында татар халкының традицион туй йолалары элементларын үз эченә алган никахлашу тантанасы узачак. Никахны теркәү Татарстан Республикасы көне кысаларында үткәрелә.

ТР Рәисе Рөстәм Миңнеханов Telegram-каналында шәхси сәхифәсенә язылучыларны Татарстан Республикасы Дәүләт флагы көне белән тәбрик итте.

Мәскәү Татар мәдәнияте үзәгендә «Татар моңнары» ансамбленең концерты узган. Бу хакта Мәскәү татарлары автономиясе матбугат хезмәте яза.

Татарстанның барлык салым органнарында телефон номерлары үзгәрде. Бу хакта ведомствоның матбугат хезмәте хәбәр итә.

Татарстанда бүген аязучан болытлы һава көтелә, көндез явым-төшемсез, әмма кайбер районнарда томан булырга мөмкин. Бу хакта ТР Гидрометеоүзәгенең матбугат хезмәте хәбәр итә.

Татарстан Республикасы Дәүләт Советы Рәисе Фәрит Мөхәммәтшин Татарстан Республикасы Дәүләт флагы көне уңаеннан татарстанлыларны котлады.

Татарстанда яңа туган балада дөньяга килүенең беренче көннәрендә үк умыртка-мускул атрофиясе авыруын ачыклаганнар.

Зәй районы Сармашбаш мәдәният йортында авыл көрәшчеләренә багышланган күргәзмә-экспозиция оештырылган. Әлеге эш башында үзе дә көрәшче, мәктәптә көрәш түгәрәге алып баручы Азат Кашапов һәм мәдәният хезмәткәрләре тора. Бу адым – тәрбияви әһәмияткә ия матур башлангыч. Бу хакта Бөтендөнья татар конгрессы матбугат хезмәте хәбәр итә.

Түбән Камада 35нче микрорайонда «Ак каен» мәчете төзелеше дәвам итә. Аның янындагы 6 мең квадрат метрлы территория төзекләндереләчәк. Анда ял зонасы һәм арт-объектлар, балалар мәйданчыгы була.

Әлмәттә башлангыч сыйныф укучысы шәһәр күлендә боз астына төшеп китә. Аңа ярдәмгә Әлмәтнең автомобиль юллары идарәсе хезмәткәре Руслан Сабаев килә. Ир-атның игътибарлыгы аркасында малай исән һәм сәламәт кала. Бу хакта район башлыгы Тимур Нагуманов Телеграм-каналында хәбәр итте. «Әлмәт таңнары» шул хакта яза.

Зәйнең Бигеш мәдәният йортында Әниләр көненә багышланган «Йөрәк җылым сиңа, әнием!» дип исемләнгән концерт булды. Бәйрәм концерты сәхнәләштерелгән «Зәкия Сабан туе» белән башланып китте. Бу хакта «Зәй яңалыклары» хәбәр итә.

Чаллыда 62 нче мәгариф үзәге базасында «Бер тарихи вакыйганың бердәм көне» республика семинары булды. Аны Татарстан Мәгариф һәм фән министрлыгы, Казан федераль университетының Халыкара мөнәсәбәтләр институты, Чаллы шәһәре башкарма комитетының мәгариф идарәсе оештырды. Бу хакта министрлыкның матбугат хезмәте хәбәр итә.