Новости за 22.10.2023

Азнакай районының Октябрь Бүләк авылы 100 еллык юбилеен билгеләп узды. Авылдашлар, якташлар туган авылларының 100 еллыгына багышланган тантаналы чарага җыелды, шунда ук Октябрь Бүләк тарихына багышланган китап тәкъдим ителде. Бу хакта «Азнакай» сайтында хәбәр ителә.

Яшел Үзәннең Васильево бистәсендә яшәүчеләр җыелган 89900 сум акчага якташларына 20 исемле посылка әзерли. Анда эчке киемнәр, кулдан бәйләнгән йон оекбашлар, медикаментлар, шәхси гигиена һәм азык-төлек җыелмалары салына. Шулай ук госпиталь өчен 120 урын-җир комп­лекты, 30 литр бал, 1850 сумлык медикаментлар җибәрелгән. Бу хакта «Яшел Үзән» сайтында хәбәр ителә.

Мамадыш районы туристлык инфраструктурасын үстерүе белән шаккаттыруын дәвам итә. Туристларны җәлеп итү тагын бер объект, ягъни зоопарк төзелә. Бу хакта «Нократ» сайтында хәбәр ителә.

Бүген Казанның «Ак Барс» хоккейчылары Мәскәү шәһәренең ЦСКА командасын 4:1 исәбенә җиңде. Матч Казанда «Татнефть Арена» боз сараенда узды.

Алабуга районы Свиногорье авылының Мәдәният йортындагы концерт залы бер ел элек диярлек хәрби хезмәткәрләр өчен маскировкалау челтәрләре үрү остаханәсе итеп үзгәртеп корылган. Авылда яшәүчеләр 143нче челтәрне үрүне тәмамлады. Бу хакта «Алабуга нуры» хәбәр итә.

Төркиядә татар мәдәниятен, сәнгатен яшәтү һәм танытуга биниһая өлеш керткән милләттәшебез Наилә Бинарк вафат. Бу хакта Анкарада яшәүче галим Ильяс Мифтахов хәбәр итә.

Көньяк Корея, АКШ һәм Япония тәүге тапкыр бергә хәрби-һава көчләре өйрәнүләрен үткәрде. Маневрлар 22 октябрьдә көннең икенче яртысында Корея ярымутравының көньяк өлешендә булды. Бу хакта «Российская газета» Kyodo агентлыгына сылтама белән хәбәр итә.

Бу айның соңгы декадасында, 21-30 октябрьдә, Татарстанда уртача һава температурасы климатик нормадан бер градуска түбәнрәк булачак. Бу хакта ТР Гидрометеорология һәм әйләнә-тирә мохитне күзәтү идарәсенең матбугат хезмәте хәбәр итә.

2023 ел башыннан алып 4,4 меңгә якын кеше Россия гражданлыгыннан баш тарткан. РФ Тышкы эшләр министрлыгының Консуллык департаменты директоры Алексей Климов РИА Новости агентлыгына биргән интервьюсында шулай дип белдерде.

Әлегә X сыйныфка һәм көллиятләргә кабул итү моделен үзгәртүгә юнәлдерелгән бернинди чаралар да күрелми. Бу хакта ТАСС агентлыгы Мәгариф һәм фән өлкәсендә күзәтчелек федераль хезмәтенә (Рособрнадзор) сылтама белән хәбәр итә.

Быел Идел елгасында суның биеклеге кимү аркасында Зөя утрау-шәһәрлегендә шәһәр бистәсен әйләндереп алган борынгы койма калдыклары өскә чыккан. Бу – Щука елгасы янында яр буенда ачыкланган шәһәр мәдәнияте археологиясенең кыйммәтле объекты.

Тарих фәннәре докторы, профессор, Татарстан Республикасы Фәннәр академиясенең чит ил әгъзасы, галим Надир Дәүләтнең хатыны Берил Дәүләт социаль челтәрдә җәмәгать эшлеклесе, язучы, Татарстанның халык шагыйре Разил Вәлиев турында истәлекләре белән уртаклашкан.

Росстат мәгълүматларыннан күренгәнчә, 2023 елның гыйнвар – август айларында Татарстанда үлем-китем очраклары тулаем бер елга карата 6,1 процентка кимегән.

Җырчы Радик Юлъякшин – Элвин Грей төркемендә эшләгән музыкант Артур Кусимов белән хушлашу мәрасиме Казанда үтәчәк.

Әмирхан урамында төзелә торган йортның субайларына килеп төшкән җиңел автомобильнең йөртүчесе исерек булган. Бу хакта «Татар-информ» агентлыгына Казан шәһәре Дәүләт автоинспекциясендә хәбәр иттеләр.

Казанда XI «Наше время — Безнең заман» эшләүче яшьләр ачык республика телевизион иҗат фестивале зона этабының йомгаклау гала-концертында булды. Быел конкурста республика оешма-предприятиеләрендә эшләүче 600дән артык үзешчән артист катнашты.

Россиянең ун төбәге Татарстан үрнәгендә шәхси клиникаларга абортлардан баш тартырга кушкан, дип хәбәр итә Татарстанда Кеше хокуклары буенча вәкил Ирина Волынец.

«Менделеев Мирасы» дигән мәктәп театры «Сугыш ярасы» дип аталган татарча спектакль тәкъдим итте. Муниципаль берәмлек матбугат хезмәтендә «Татар-информ» агентлыгына белдерүләренчә, театр әле күптән түгел генә оештырылган, «Сугыш ярасы» исә аларның репертуарындагы беренче спектакль.

11-12 ноябрьдә Екатеринбургта «Шома бас» Халыкара татар биюләрен башкаручылар бәйгесе узачак. Конкурсның Гран-при иясенә татар милли сәхнә киемнәре тегү өчен 100 000 сумлык сертификат тапшырылачак. Бәйгедә катнашу өчен документлар 3 ноябрьгә кадәр кабул ителә. Татарстанның Свердловск өлкәсендәге Даими вәкиллеге шул турыда хәбәр итте.

Бүген иртән Татарстанның берничә районында кар яуган. Әйтик, республиканың Бөгелмә һәм Баулы районнарында яшәүчеләр кар сарган урамнар һәм ишегалларын фотога төшергән.

Яшел Үзән мэры Михаил Афанасьев 8 яшьлек бала автобус тәгәрмәче астында калып һәлак булганнан соң якын арада юл хәрәкәте иминлеге буенча комиссия төзеләчәге, анда әлеге фаҗиганең барлык нечкәлекләре җентекләп тикшереләчәге хакында хәбәр итте. Михаил Афанасьев үзенең Telеgram-каналында шулай дип язган.

XXV Халыкара Әдәби марафон тәмамланды. Ул 1-21 октябрь көннәрендә, ягъни 21 көн дәвам итте. Әдәби марафончылар, үзләре сайлап алган әдип һәм шагыйрьләрнең әсәрләрен укып, алардан иң ошаган өзекләрне социаль челтәрдәге аккаунтларында һәр көнне уртаклашып тордылар.

Татарстаннан Свердловск өлкәсенә килгән язучылар – Тукай премиясе лауреатлары Камил Кәримов һәм Ләбиб Лерон ике көндә өлкәнең 7 авылында һәм Красноуфимск шәһәрендә халык белән очрашты. Болар – 4 районда урнашкан Әҗегол, Арый, Шәкүр, Акбаш, Уфа Шигере, Үрмәкәй, Аракай (Әрәкәй) авыллары. Очрашулар башлыча мәктәпләрдә узды.

Әлмәттә сәламәтлек ягыннан мөмкинлекләре чикле балалар өчен «Алга» ял һәм үсеш үзәге ачылды. «Татнефть» булышлыгы белән әлеге проектка тәҗрибәле белгечләрне җәлеп итү мөмкин булган. Бу хакта «Әлмәт таңнары» хәбәр итә.

«Республиканың иң яхшы территориаль-иҗтимагый үзидарәсе» конкурсында Иске Зәйнең «Мәктәп» үзидарәсе рәисе Светлана Долгова өченче урын алып, республика бюджетыннан 600 мең сумлык грант отты. Бу хакта «Зәй яңалыклары» хәбәр итә.