Новости за 25.12.2022

Минзәлә районында икенче газ салу станциясе ачылды. Видеокүпер аша башкарылган бу чарада Минзәлә район башлыгы Айдар Салахов, район башкарма комитеты җитәкчесе Марат Кәримов катнашты.

26 декабрьдән 7 гыйнварга кадәр Әлмәт муниципаль районында Яңа ел чаралары оештырылачак. Бу хакта Әлмәт муниципаль районының матбугат хезмәте хәбәр итә.

Язылу кампаниясен оештыруда нәтиҗәле хезмәттәшлеге һәм ярдәме өчен Аксубай урманчылыгы җитәкчесе-урманчысы Андрей Ильмухин «Татмедиа» АҖ Рәхмәт хатына лаек булды.

Төркиядә Чаллы язучысы, шагыйрә Әлфия Ситдыйкованың «КамАЗ» заводы белән бәйле повесте төрекчәгә тәрҗемә ителеп, шушы көннәрдә сатуга чыкты. Бу хакта әсәрнең тәрҗемәчесе үзе хәбәр итә.

Татарстан Президенты Рөстәм Миңнеханов Яшел Үзән районына эш сәфәре вакытында шәһәр тибындагы Васильево бистәсендә «Волна - Дулкын» бассейнын ачты. Бу хакта республика Президентының матбугат хезмәте хәбәр итә.

Иртәгә Татарстанда аязучан болытлы һава көтелә. Юлларда көчле бозлавык, аерым районнарда томан, дип хәбәр итә ТР Гидрометеорология үзәге матбугат хезмәте.

26-27 гыйнварда Тинчурин театрында премьера көтелә. Биредә тамашачылар игътибарына Туфан Имаметдинов сәхнәләштергән «Идегәй» спектакле тәкъдим ителәчәк. Шушы көннәрдә язучы, Татарстанның атказанган сәнгать эшлеклесе, А.Алиш премиясе лауреаты Галимҗан Гыйльманов Тинчурин театрында лекция үткәрде. Бу хакта Бөтендөнья татар конгрессының матбугат хезмәте хәбәр итә.

2023 ел уртасыннан дәүләт хезмәтләрендә өлешләп йорт төзүдә катнашучыларга килгән зыянны түләү өчен гариза тутыру мөмкинлеге барлыкка киләчәк. Аннан проблемалы йортлардан, бөлгенлеккә төшкән төзелеш компанияләреннән фатир сатып алган кешеләр файдалана алачак. Бу хакта РФ Хөкүмәте сайты хәбәр итә.

Россия Кораллы көчләре Коры җир гаскәрләренең элеккеге командующие, армия генералы Алексей Маслов 70нче яшендә вафат булган. Бу хакта ТАСС агентлыгы «Уралвагонзавод» концернына сылтама белән хәбәр итә.

Татарстан Президенты Рөстәм Миңнеханов Казанда республика Чыршы бәйрәмендә катнашучыларны котлады. Ул яшь тамашачыларга беркайчан да бирешмәүләрен һәм тормышта үз урынын табуларын теләде.

Татарстанда чыгарылыш сыйныф укучыларының татар телен белмәвендә күбесенчә мохит гаепле, чөнки балаларда телне өйрәнүгә ихтыяҗ юк дип саный ТР мәгариф һәм фән министры Илсур Һадиуллин. Аның сүзләренчә, хәзер мәктәпләрдә телне өйрәтү методикасы үзгәрә, әмма аңа чынлап та ихтыяҗ булырга тиеш.

Башкортстанның Чишмә районы Ярми авылында, торак йортта янгын чыгып, ике кешенең гомере өзелгән. Бу хакта РИА Новости агентлыгы Гадәттән тыш хәлләр министрлыгының Башкортстан буенча Баш идарәсенә сылтама белән хәбәр итә.

Алда торган бәйрәм көннәренә бәйле рәвештә, Татарстанда күп функцияле үзәкләрнең эш графигы үзгәрә. Әйтик, 1-8 гыйнварда күп функцияле үзәк офислары ял итәчәк, 31 декабрьдә исә эш көне 12.00 сәгатькә кадәр дәвам итәчәк.

«Россия коммунистлары» партиясе Дәүләт Думасына махсус хәрби операция барган вакытта Яңа ел бәйрәмнәрен киметү үтенече белән мөрәҗәгать юллады. Бу хакта РИА Новости агентлыгы партия рәисе Сергей Малинковичка сылтама белән хәбәр итә.

19 декабрьдә «Дар» Мәдәният үзәгендә Мәскәү шәһәре мөселманнары Диния нәзарәте съезды узды. Бу хакта Россия Мөфтиләр шурасының матбугат хезмәте хәбәр итә.

Бүген көндезге унберенче яртыда 101 янгын сагы номерына Чистай урамында төзелә торган бинада янгын чыгуы хакында хәбәр килгән. Бинаның дүртенче катында төзелеш чүп-чарына ут капкан, янгынның мәйданы 2 квадрат метр тәшкил иткән.

Стопкоронавирус. рф порталында хәбәр ителгәнчә, узган тәүлектә Татарстанда коронавирус инфекциясенең 83 яңа очрагы ачыкланган. 21 пациент хастаханәгә озатылган.

Татарстан Президенты Рөстәм Миңнеханов республика Чыршы бәйрәмендә катнашучылар – чемпионат һәм халыкара ярышларның җиңүчеләре белән очрашты.

Якшәмбе иртәсендә, һава торышы начар булу сәбәпле, Мәскәүнең «Внуково», «Домодедово» һәм «Шереметьево» аэропортларында 22 рейсы тоткарлаганнар һәм 13ен расписаниедән алганнар. Бу хакта РИА Новости агентлыгы «Яндекс. Расписание» сервисы мәгълүматларына сылтама белән хәбәр итә.

Васильево бистәсендә этләрне атканнан соң «Хайваннарга карата рәхимсез мөнәсәбәт» маддәсе буенча җинаять эше кузгатылган. Җинаять эшен тикшерүне Яшел Үзән прокуратурасы контрольгә алган, дип хәбәр итте ТР прокурорының өлкән ярдәмчесе Руслан Галиев.

Кредит алыр алдыннан аны түли аласызмы-юкмы икәнлеген уйларга кирәк. Сезнең финанс иминлеге өчен куркыныч тудыра торган займнар да була, дип белдерде юрист Елена Кудерко «Прайм» агентлыгына. Бу хакта РИА Новости агентлыгы хәбәр итә.

Татарстанда Әлмәт драма театры инициативасы буенча ТР Мәдәният министрлыгы ярдәме белән Зәкия Туишева исемендәге театраль премия гамәлгә куелды. Ул Бөек Ватан сугышында катнашкан ТАССРның халык артисты, Әлмәт татар драма театры режиссеры Зәкия Туишеваның исемен мәңгеләштерү максатыннан булдырылды.

Яңа ел каникулы Татарстан халкы өчен сигез көн – 1нче гыйнвардан алып 8нче гыйнварга кадәр дәвам итәчәк.

Илдән киткән россиялеләргә кире кайту өчен ниндидер преференцияләр бирмәскә кирәк. Үз хатасын аңлаган кешеләр кире кайтты инде, дип искәртте Дәүләт Думасы Рәисе Вячеслав Володин.

Кичә Түбән Кама районында, Чистай – Түбән Кама автомобиль юлының 73нче чакрымында куркыныч юл-транспорт һәлакәте булган. Бу хакта республика Дәүләт автоинспекциясеннән хәбәр иттеләр.