Новости за 05.10.2022

6 октябрьдә иртәнге сәгать 10да Әлмәттә пенсия алды һәм пенсия яшендәге гражданнар өчен вакантлы эш урыннары ярминкәсе узачак. Шулай ук барлык теләүчеләр дә чакырыла. Бу хакта Әлмәт халыкны эш белән тәэмин итү үзәгенә сылтама белән «Әлмәт таңнары» хәбәр итә. 

Пәнҗешәмбе көнне Татарстан территориясендә янә яңгырлар, көньяк-көнбатыш һәм көнбатыштан талгын җил көтелә. Бу хакта республиканың Гидрометеорология үзәге хәбәр итә.

Киләсе елның 1 гыйнварыннан Дәүләт хезмәтләре порталында дәүләт пошлиналарын түләүгә 30 процентлы ташлама гамәлдән чыгарылачак. РИА Новости РФ Финанслар министрлыгына сылтама белән шул турыда хәбәр итә.

Бүген Татарстан Республикасы Президенты Рөстәм Миңнеханов II Халыкара төзелеш чемпионаты кысаларында Төрекмәнстан делегациясе вәкилләре белән очрашты. Чара «Казан Экспо» халыкара күргәзмә үзәге мәйданчыгында уза. Республика җитәкчесенең матбугат хезмәте шул турыда хәбәр итә.

Татарстанда балигъ булмаган яшьләр кылган җинаятьләр саны арта бара. Бу хакта туры эфир вакытында Татарстан вице-премьеры Ләйлә Фазлыева сөйләде.

Көндезге һәм көндезге-читтән торып уку бүлекләрендә беренче һөнәри белемнәрен алучы студентларга мобилизациядән кичектерелеп тору хокукы биреләчәк. Шундый карарны имзалавы турында Россия Президенты Владимир Путин «Ел укытучысы» бәйгесе финалистлары белән очрашуда белдерде. Бу турыда ТАСС хәбәр итә.

Санкт-Петербургта һәм Ленинград өлкәсендә Татар мәдәнияте көннәре уза. Аның кысаларында Ленинград өлкәсенең Дуслык йортында Идел буе Болгар дәүләтендә ислам динен кабул итүгә 1100 ел тулуга багышланган сәнгать күргәзмәсе ачылды. Бу турыда Татарстан Республикасының Санкт-Петербург һәм Ленинград өлкәсендәге Даими вәкиллеге хәбәр итә.

Ике ел дәвамында Дәүләт хезмәтләре порталында авыл хуҗалыгы җитештерүчеләре өчен 18 сервис булдырылачак. Бу хакта Россиянең Премьер-министры Михаил Мишустин «Алтын көз» агросәнәгать күргәзмәсендә әйтте, дип хәбәр итә ТАСС.

Татарстан Республикасы Дәүләт Киңәшчесе Минтимер Шәймиев «Адымнар» күп телле мәктәбе коллективын Укытучылар көне белән котлады.

Татарстан Республикасы Дәүләт Киңәшчесе Минтимер Шәймиев беренче укытучысын һаман да оныта алмавын әйтте.

Татар телендәге ябык әдәби конкурска җибәрелгән әсәрләр техник таләпләргә җавап бирергә тиеш дип ассызыклады оештыручылар Татар телендәге ябык әдәби конкурска багышлап «Татар-информ»да үткәрелгән матбугат конференциясендә.

Бүген Казанга, Татарстан Журналистлар берлегенә Казан һәм Чаллы шәһәрләреннән, Биектау, Саба, Яшел Үзән, Буа, Кайбыч, Яңа Чишмә, Әлмәт һәм Лениногорск районнарыннан өлкән яшьтәге журналистлар җыелды.

Россия Премьер-министры Михаил Мишустин «Алтын көз – 2-22» Бөтенроссия агросәнәгать күргәзмәсендә Татарстан Республикасы стендын карады. Татарстан Президенты Рөстәм Миңнеханов аңа республиканың агросәнәгать комплексының төп күрсәткечләре турында сөйләде.

Татарстан язучылар берлеге рәисе Ркаил Зәйдулла татар телендәге ябык әдәби конкурска кертелгән үзгәрешләр турында аңлатты. Аерым алганда, сүз әдәби тәнкыйть номинациясе турында барды.

Төбәкләрдә мобилизацияләнгән кешеләргә түләүләр белән бәйле проблемалар килеп чыкса, бу мәсьәлә федераль үзәк белән берлектә хәл ителәчәк. Бу хакта Россия Президентының матбугат секретаре Дмитрий Песков хәбәр итте.

Татарстан китап нәшр­иятында iагыйрь Рифат Җамалн­ың​ «Син мине сагын­ма» дип исемләнгән яңа китабы чыкты.

Татарстан мөселманнары Диния нәзарәте, гүзәл затларның күпсанлы үтенечләре буенча, мөселман яшьләре арасында популярлык казанган «Яшь килен» проектының яңа җиденче сезонын башлады. 4 октябрьдә Казанның Галиев мәчетендә проектта катнашучылар беренче тапкыр очрашты. Бу юлы яшь килен булырга 50 мөслимә теләк белдерде, дип хәбәр итте нәзарәтнең матбугат хезмәте.

Казаннан мобилизацияләнгән кешеләрнең гаиләләренә күрсәтеләчәк ярдәм төрләре турында бүген Казанның социаль-гуманитар мәсьәләләр буенча шәһәр штабы утырышында сөйләделәр. Башкарма комитет хезмәткәрләре барлык мобилизацияләнгән ир-атларның гаиләләре белән танышып чыкты, нинди төр ярдәм кирәген ачыклау өчен аларның әти-әниләре, хатыннары, балалары белән аралашты.

9 октябрьдә Уфаның «Родина» кинотеатрында Булат Йосыповның «Шагыйрь көндәлеге» фильмын ябык күрсәтү була. «Беренче Республика» милли трилогиясенең соңгы картинасы (анда шулай ук «Бабич» һәм «Беренче Республика» фильмнары да керә) Башкортстанның халык шагыйре Рәми Гариповның тормышы һәм иҗатына багышланган. Бу хакта «Башинформ» агентлыгы хәбәр итә.

Бүген Арча район Мәдәният йортында РСФСРның Халык мәгарифе отличнигы, Татарстанның атказанган мәктәп укытучысы Фәрхәт Зыятовны искә алу кичәсе узды. 

Чәршәмбе көнне Казан Кремлендә чирәмдәге хоккей буенча Россиянең 20нче чемпион титулын откан «Динамо-Ак Барс» командасын хөрмәтләделәр.

Юл һәлакәте кичә көндез Чирмешән – Нурлат трассасының 25нче чакрымында, юл «Солнечный» лагерена борыла торган урында булган. «Лада Нива» автомобиленең йөртүчесе, идарәсен югалтып, юл читенә төшеп киткән.

«Әкият» Татар дәүләт курчак театры ике спектаклен Чаллы балалары карый алачак.

2023 елда Татарстан җирү сөрү буенча X Россия чемпионатын кабул итәчәк. Республика Президенты Рөстәм Миңнеханов «Алтын көз 2022» агросәнәгать күргәзмәсендә булачак вакыйганың символын кабул итеп алды. Бу хакта ТР Президентының матбугат хезмәте җитәкчесе Лилия Галимова хәбәр итә.

«Время кино» питчингына гаризалар кабул ителә башлый. Региональ кино проектлары питчингы «Алтын тәлинкә» III регионара кинопремиясе кысаларында үтә.