სამწუხაროდ, გირჩი გამოტოვებს 2016 წლის საპარლამენტო არჩევნებს - გირჩის საგანგებო განცხადება
ახალი პოლიტიკური ცენტრი - გირჩი საგანგებო განცხადებას ავრცელებს. განცხადებაში ნათქვამია, რომ კოალიციაში პრობლემებია, როგორც ადამიანური რესურსის კუთხით, ასევე ფინანსურად, რის გამოც მათ მიიღეს გადაწყვეტილება, გამოეთიშონ საპარლამენტო არჩევნებს.
"გვინდა, სანამ ეს მნიშვნელოვანი საკითხი პოლიტიკური მანიპულაციების თემა გახდება, ჩვენ მხარდამჭერებსა და გულშემატკივრებს განგიმარტოთ.
„გირჩმა მიიღო გადაწყვეტილება, დატოვოს საარჩევნო ბლოკი პაატა ბურჭულაძე - სახელმწიფო ხალხისთვის. ეს არის რთული, მაგრამ საჭირო გადაწყვეტილება, რადგან ბლოკს აქვს სერიოზული პრობლემები, როგორც ადამიანური ურთიერთობებისა და მენეჯმენტის, ისე ფინანსური კუთხით.
„გირჩი არის საკუთარი პრინციპების ერთგული და არსებობს ზღვარი, რომელსაც ჩვენ არასოდეს გადავალთ. სწორედ ამიტომ მივიღეთ ეს გადაწყვეტილება. სამწუხაროდ, გირჩი გამოტოვებს 2016 წლის საპარლამენტო არჩევნებს, მაგრამ ჩვენ დავრჩებით პარტიად, რომელმაც არსებობის ერთი წლის განმავლობაში შექმნა პოლიტიკური დღის წესრიგი საქართველოში.
"გირჩი რჩება პოლიტიკაში და განაგრძობს ბრძოლას იმ იდეებისა და ფასეულობებისთვის, რომლისაც სჯერა. შევხვდებით შემდეგ არჩევნებზე,“- ნათქვამია განცხადებაში.