ملګري ملتونه:که افغانستان سره په بېړه مرسته ونه شي اقتصاد به یې وپاشل شي
د دې کمېشنرۍ ویاند بابر بلوچ چې کابل ته تللی وايي، افغانان له یوې خوا جګړو ځپلې او له بلې خوا وچکالۍ زیانمن کړي دي.
ده پر نړیوالې ټولنې غږ وکړ: "له نړۍ زموږ خواست دا دی چې دې وخت کې افغانان او افغانستان هېر نه کړي، خپلې مرستې له افغانانو سره جاري وساتي. افغانان له یوې خوا له جګړې سره مخامخ و، بیا وچکالي پېښه شوه، اوس ژمی را روان دی او د هوا درجه صفر ته ټیتېږي."
اروپايي اتحادیې د سې شنبې په ورځ له افغانستان سره یو میلیارډ او ۲۰۰ میلیونه ډالر مرسته اعلان کړه.
د دې اتحادیې د کمېسیون مشرې اورزلا وون دیرلین د جي شل هېوادونو د مشرانو په انلاین غونډه کې وویل چې دا مرسته د اروپايي اتحادیې پر مخکینۍ اعلان شوې مرستې سربېره ده.
ګڼو هېوادونو د افغانستان د اقتصاد د پاشلتیا د مخنیوي او د بشري ناورین د نه پېښدو لپاره له افغانستان سره په مرستو ټینګار کړی دی.
د جرمني صدراعظمې انګېلامېرکل نړیوالې ټولنې ته خبرداری ورکړی چې پرېنه ږدي چې د افغانستان اقتصاد سره وپاشل شي.
د هغې په باور د افغانستان اقتصادي سقوط د هېڅ چا په ګټه نه دی.
د کډوالو د لویې کمېشنرۍ ویاند بابر بلوچ وايي، د نړیوالې ټولنې ترڅنګ ملګري ملتونه هم د افغانانو ملاتړ ته دوام ورکوي: "له افغانانو سره زموږ د 'یو.اېن. ایچ.سي.ار' مرسته شته، موږ افغانستان کې او د افغانستان په ګاونډیوهېوادونو کې له دوی سره مرسته کوو."
د ملګروملتونو پراساس درې میلیونه افغانان په خپل هېواد کې دننه بې ځایه شوي چې د هغو له منځه یوازې ۷ لکه په روان ۲۰۲۱ میلادي کې بې ځایه شوي دي.
د طالبانو له واکمنېدو سره له یوې خوا ډېروخلکو کار له لاسه ورکړی، له بلې خوا د اکثرو خلکو پیرودوس (د خرید توان) کم شوی او په همدې حال کې د جنسونو بیې لوړې شوي دي.
د ملګروملتونو د کډوالو لویې کمېشنرۍ په وروستیو څو ورځو کې زرګونو کورنیو ته خوراکي مواد، کمپلې او ځینې نور اړتیا وړ شیان ورکړي دي.