امریکا له چین 'په کرونا ویروس د لومړنیو اخته شویو کسانو' معلومات غوښتي
د امریکا د ملي امنیت سلاکار جیک سولیوان له چین څخه وغوښتل چې په کرونا ویروس د لومړنیو اخته شویو کسانو په اړه معلومات وسپاري.
د روغتیا نړیوال سازمان د هغې ډلې چې تېره میاشتیې د کرونا د سرچینې په اړه د څېړنو لپاره چین ته سفر کړی و، یوه غړي ویلي؛ چین د لومړنیو ۱۷۴ تنو په اړه چې په ووهان ښار کې په کرونا ویروس اخته شوي وو، د معلوماتو له ورکولو دډه کړې ده.
د سپینې ماڼۍ د ملي امنیت سلاکار په چین کې د کرونا د سرچینې په اړه د روغتیا نړیوال سازمان پر راپور ژوره اندېښنه څرګنده کړې او له چینايي چارواکو یې غوښتي چې په دې برخه کې معلومات شریک کړي.
د چین حکومت ادعا کوي چې په ووهان ښار کې په کرونا ویروس لومړني اخته شوي کسان د تېر کال په ډسمبر کې تشخیص شوي دي.