ایران د نړۍ له اټومي قدرتونو سره د خبرو لپاره نوى شرط کېښود
د ایران رهبر ایت الله علي خامنه ای وايي، که امریکا متحده ایالتونه غواړي چې ایران د نړۍ له اټومي قدرتونو سره تړون ته ور وګرځي، ټول بندیزونه دې له تهرانه لرې کړي.
د ایران دولتي ټلویزیون د راپور له مخې علي خامنه اي نن په دې اړه خبرې کړي دي.
هغه زیاته کړې چې دا د ایران قطعي سیاست دی او څوک ترې نه شي ګرځېدی.
له دې مخکې د ایران د بهرنیو چارو وزیر محمد جواد ظریف له امریکا غوښتی و چې ژر تر ژره دې اټومي تړون ته ور وګرځي.
د امریکا مخکیني ولسمشر ډونالډ ټرم په ۲۰۱۸ کال کې له ایران سره د ۲۰۱۵ کال له اټومي تړون ووت او په دغه هېواد یې سخت بندیزونه ولګول.
تهران یې په ځواب کې کرار کرار د تړون ځینې برخې نقض کړې او ویې ویل، چې نور به ورته متعهد پاتې نه شي.
د امریکا د نوي ولسمشر جوبایډن ادارې ویلي، چې دغه تړون ته د بیا ورګرځېدو په لارو چارو څېړنې کوي او که تهران د دې اټومي موافقې کره پلي کولو ته ستون شي واشنګتن به هم دا لار تعقیب کړي.