د ملي مصالحې عالي شورا: طالبانو په بې دلیله پلمو د سولې خبرې ځنډولي
د ملي مصالحې عالي شورا پر طالبانو تور لګولی چې په بې دلیله او ناموجهو پلمو د سولې په خبرو کې د ځنډ باعث کېږي.
د جنوري په پنځمه د افغان دولت او طالبانو د مرکچي پلاوو ترمنځ د خبرو د دوهمې مرحلې له پیل راهیسې بین الافغاني مذاکرات په ټپه درېدلي دي.
د سولې د عالي شورا نن جمعه (د سلواغې ۱۷مه) په یوه خبرپاڼه کې د دې شورا د رئیس عبدالله عبدالله له قوله ویلي چې طالبان د جګړې د پای ته رسولو په اړه د اصلي خبرو پرځای په سفرونو او حاشیوي بحثونو بوخت دي، خو وسله وال یې په افغانستان کې د خلکو پرضد تشدد ته دوام ورکوي.
طالبانو تر اوسه د دې بیان په اړه غبرګون نه دی ښودلی.