Марат Хөснуллин Мәскәү-Казан юлын ике тапкыр тизрәк төзү ниятен әйтте
(Казан, 23 май, «Татар-информ»). Мәскәү-Казан түләүле юлы сигез ел урынына дүрт елда төзелергә мөмкин. Бу хакта вице-премьер Марат Хөснуллин Инстаграм челтәрендәге үз битендә туры эфир вакытында әйтте.
Вице-премьер сүзләренчә, ул проектка шәхсән үзе алынган. Төзелешнең норматив сроклары — сигез ел, Марат Хөснуллин бу срокны дүрт елга кыскартырга ниятли.
«Кичә мин эш планын билгеләдем, бу төзелешне җәелдерү өчен атна саен штаб утырышы үткәрәчәкмен», — диде ул.
«Татар-информ» мәгълүмат агентлыгы хәбәр иткәнчә, Мәскәү — Казан юнәлешендәге М12 юлы төзелешенең яңа варианты эшләнде.