PE-ja miraton raportin për Kosovën, mbështet liberalizimin e vizave
Në seancën plenare të Parlamentit Evropian janë miratuar raportet për katër shtete të Ballkanit Perëndimor. Gjatë ditës së enjte është diksutuar për raportet e progresit për vendet e Ballkanit Perëndimor. Para se të votohej për to u zhvillua një debat në seancë plenare. Më herët, më 23 shkurt, të njëjtat raporte ishin miratuar në Komisionin e politikës së jashtme.
Raporti për Kosovën në pjesën më të madhe flet për problemet me të cilat përballet Kosova, nga nevoja për një reformë të sistemit zgjedhor, mungesa e transparencës në pronësinë e mediave, sfidat në ruajtjen e mjedisit, nevojën për depolitizimin e administratës publike dhe reformën e gjyqësorit.
Nga Kosova kërkohet që të bëjë më shumë edhe në luftë kundër krimit të organizuar dhe korrupsionit. Po ashtu bëhet ftesë për një angazhim më të madh të autoriteteve të Kosovës edhe në komunikim me shoqërinë civile. Nga Kosova, sikur edhe nga Serbia, kërkohet përkushtim dhe qasje konstruktive edhe në dialog.
Raportuesja për Kosovën në Parlamentin Evropian, Viola von Cramon, ka thënë në paraqitjen e saj se ky raport shënon edhe sukseset e arritura në Kosovë dhe sfidat e problemet me të cilat Kosova po përballet.
Ajo u është falënderuar kolegëve nga të gjitha grupet e Parlamentit Evropian për mbështetjen e këtij raporti.
“Parlamenti Evropian mbetet i bashkuar fuqishëm krah popullit të Kosovës. Ata janë me shumicë të madhe në favor të BE-së. Në fakt, asnjë popull në rajon nuk shpreh më shumë mbështetje për BE-në sesa populli i Kosovës. Por kjo nuk është diçka që duhet të kuptohet nga ne si e garantuar dhe ne duhet po ashtu të përmbushim obligimet dhe premtimet tona, sidomos për liberalizimin e vizave”, ka thënë raportuesja për Kosovën.
Ajo ka shtuar se “ndan frustrimin me qytetarët e Kosovës për mungesën e liberalizimit të vizave” dhe ka bërë ftesë për vendet anëtare të BE-së që në Këshill të marrin më në fund vendimin për heqjen e vizave për Kosovën.
Duke folur në emër të Presidencës Potugeze të BE-së Ana Paula Zacarias, sekretare shteti për çëstje evropiane, ka thënë se “Portugalia njeh rëndësinë që liberalizimi i vizave ka për qytetarët e Kosovës dhe do të vazhdoj të merret me këtë çështje”.
Von Cramon ka bërë ftesë për BE-në që të ndihmoj sa më shpejt në furnizimin më të madh me vaksina për Kosovën.
Kosova mbetet vendi i vetëm në Evropë që nuk ka nisur procesin e vaksinimit kundër COVID-19, dhe nuk ka ndonjë konfirmim zyrtar se kur mund të arrijë kontigjenti i parë i vaksinave në Kosovë.
Von Cramon ka bërë thirrje që fondet nga IPA të përdoren më shumë në ruajtjen e mjedisit jo vetëm për qytetarët e Kosovës por për tërë Evropën.
“Raporti ynë inkurajon Kosovën të bëj më shumë përpjekje në çështjet e brendshme nga edukimi dhe shëndetësia e deri tek reformat e tjera. “Uroj Kryeministrin Kurti dhe i uroj sukses në përballje me sfidat e mëdha”, ka thënë ajo. Sipas saj, për t’i tejkaluar problemet politike, është e nevojshme një qartësi dhe duhet të zgjidhet presidenti i vendit sa më parë.
Von Cramon ka thënë se Kosova duhet të mbetet e përkushtuar për dialog dhe të mos largohet nga dialogu. Njohja e ndërsjellë mbetet kusht për Serbinë dhe Kosovën për tu anëtarësuar në BE”.
“Të pyetesh se çfarë fiton Kosova nga dialogu është qasje e gabuar. Më shumë duhet menduar se çfarë humbet nëse largohemi nga dialogu. Largimi nga dialogu nuk është opsion as për Serbinë” ka thënë ajo. Sipas saj, Presidenti i Serbisë, Aleksandar Vuçiq, “mundet dhe duhet të shfrytëzoj shumicën që ka ne Kuvend për të arritur marrëveshje me Kosovën në dialog”.
Ajo ka thënë se në Serbi duhet të evitohet edhe keqpërdorimi i pushtetit, sidomos sulmet ndaj atyre që mendojnë ndryshe.
Raporti për Kosovën bën ftesë edhe një herë për shtetet e BE-së të cilat nuk e kanë njohur Kosovën që ta bëjnë një gjë të tillë.
Komisioneri i BE-së për zgjerim dhe fqinjësi Oliver Varhely, ka folur për punën që po bën BE-ja për të ndihmuar vendet e rajonit në furnizimin me vaksina. Ai gjithashtu ka paralajmëruar se një sasi vaksinash do të sigurohet për këto vende edhe duke ua shitur sërish nga sasia e siguruar për vendet anëtare të BE-së. Tutje ai ka rikujtuar se si BE-ja ka ndarë 70 milion euro shtesë vëtëm për të ndihmuar sigurimin e vaksinave për vendet e rajonit.
Duke folur për Kosovën, Komisioneri i BE-së po ashtu përmendi nevojën për qartësi politike si dhe zgjedhjen e presidentit.
Edhe ai ka thënë se pret fokusim në dialog mes Kosovës dhe Serbisë në mënyrë që ai të afrohet drejt përmbylljes së suksesshme. Këtë e ka thënë kur ka folur edhe për Serbinë dhe Kosovën.
Në fund të debatit Komisioneri Vayrhely ka shtuar se “rajoni ka dëshmuar përkushtimin për BE-në dhe se tash BE-ja e ka radhën që të përmbushë po ashtu premtimet”.
Raportet e Parlamentit Evropian nuk kanë fuqi obliguese për shtetet anëtare të BE-së por janë një mesazh politik.
Në raportet me Shqipërinë dhe Maqedoninë e Veriut, kërkohet që sa më parë BE-ja të nisë me këto dy shtete negociatat për anëtarësim.