Hoti paralajmëron mësim online në të gjitha nivelet e arsimit

Kryeministri në detyrë i Kosovës, Avdullah Hoti ka thënë se do të mbesin në fuqi masat e njëjta kundër pandemisë së COVID-19 pasi "trendet janë stabile". 

Hoti ka diskutuar të martën për situatën e pandemisë me ministrin e Shëndetësisë në detyrë, Armend Zemaj, drejtorin e Instituti Kombëtar të Shëndetësisë Publike, Naser Ramadani, drejtorin e Shërbimit Spitalor Klinik Universitar, Valbon Krasniqi dhe zëvendësministrin e Arsimit, Xhavit Rexhaj. 

"Po shqyrtohen mundësitë për fillimin e mësimit online në të gjitha nivelet e arsimit, për dy javët e ardhshme, duke filluar nga 22 marsi. Vendimi lidhur me këtë çështje pritet të merret sot pasdite", ka thënë Hoti përmes një postimi në rrjetin social Facebook. 

Hoti tha se është kërkuar nga institucionet përgjegjëse për kontrollin e zbatimit të masave kundër COVID -19, që të ngrisin nivelin e angazhimit përmes respektimit rigoroz të masave në fuqi.

Kosova mbetet i vetmi vend në Evropë që nuk e ka filluar procesin e imunizimit të popullatës kundër COVID-19.  Në Kosovë, vaksinat ishte paralajmëruar të vinin në shkurt, por kjo nuk kishte ndodhur.

Kryeministri në detyrë thotë se Komiteti për Imunizim dhe institucionet përkatëse janë duke i kryer të gjitha përgatitjet e nevojshme që sapo të arrijë kontingjenti i parë nga programi botëror për shpërndarjen e vaksinave në vendet e varfëra, COVAX, menjëherë të filloj vaksinimi i qytetarëve.

Që prej 13 marsit, 2020, e deri më 15 mars, 2021, Kosova ka regjistruar në total 77,827 raste me COVID-19. Prej tyre, 1,715 raste kanë përfunduar me fatalitet, ndërkaq 65,060 persona janë shëruar.