عمران خان یوه ځانګړې محکمه کې راڅرګند شو
نوموړي پر ځان د فساد لګول شوي ټول تورونه رد کړل او هغه یې سیاسي انګېزه وبلله.
د عمران خان د محاکمې جریان د تازه تاوتریخوالو پر سر اندېښنو ته په پام په محکمه کې نه بلکې د پولیسو په یوه مرکز چې سخت امنیتي تدابیر یې نیول شوي و، ترسره شو.
چارواکو وویل چې د عمران خان شاوخوا زر پلویان په پنجاب ایالت کې وروسته له هغه نیول شوي چې تېره ورځ یې د هغه له نیول کېدو وروسته اعتراضونه وکړل او په لسګونو موټرو او ودانیو ته یې اور ورته کړ.
له کراچۍ، لاهور او کوټې هم د تاوتریخوالي راپورونه ورکړل شوي دي.
دغو تاوتریخوالو چارواکي اړ کړل چې د پاکستان له څلورو ایالتونو په درېیو کې اضطراري حالت نافذ کړي او د عمران خان د پاکستان د تحريک انصاف یا پي ټي آی ګوند پر ټولو غونډو بندیز ولګوي.
د پاکستان په لویو ښارونو کې مخابراتي خدمات بند دي او هم د فېسبوک، ټویټر او یوټیوب پر ټولنیزو شبکو محدودیت لګېدلی دی.
د پاکستان د کورنیو چارو وزارت ویلي چې عمران خان د احتساب د ملي ادارې له خوا وروسته له هغې ونیول شو چې نوموړي د فساد په جلا قضیه کې د دې ادارې احضارې له پامه غورځولې وې.
عمران خان یوه ورځ وروسته له هغه ونیول شو چې د پاکستان د پوځ یو لوړ رتبه جنرال یې پر ځان د تېر میلادي کال په ناکام برید کې په لاس لرلو تورن کړ.
د پاکستان پوځ دا تور رد کړی دی.