د طالبانو دفاع وزارت د پاکستان بمبارۍ ناانساني او ظالمانه عمل وباله
د طالبانو دفاع وزارت وايي، پر خوست او کونړ د پاکستان پرونۍ بمبارۍ «غیرانساني» او «ظالمانه» عمل و.
د دغه وزارت ویاند عنایت اله خوارزمي نن رسنیو ته په لېږلي غږیز پیغام کې وویل، د دوی وزارت دا حملې غندي او د ده په وینا هېڅ هېواد باید دوی مقابل اقدام ته مجبور نه کړي.
افغان چارواکو د شنبې په ورځ ادعا وکړه، چې د پاکستان جېټ الوتکې د خوست او کونړ پر ځینو برخو حملې کړې دي.
په دغو پېښو کې د مرګ ژوبلې په اړه ضد و نقیض راپورونه ورکړل شوي دي.
په همدې حال کې د پاکستان د بهرنیو چارو وزارت د طالبانو له حکومته غوښتنه وکړه، چې د سرحدي سیمو امن خوندي کړي.
دغه وزارت په یوه اعلامیه کې دغه راز ادعا وکړه، چې ممنوعه تروریستي ډلې له دې جملې تحریک طالبان پاکستان د افغانستان له خاورې په استفاده د پاکستان پر امنیتي پوستو خپلو حملو ته دوام ورکوي.