افغانستان کې د نجونو او ښځو د تعلیم په اړه پر ټولنیزو رسنیو پيل شوی کمپاین
دغه کمپاین چې تېره ورځ په ټولنیزو رسنیو کې پیل شوی، یو شمېر مېرمنې د لنډو وېډیوګانو په جوړولو سره له نړېوالې ټولنې غواړي ترڅو په طالبانو د نجونو د ښوونځيو د بېرته پرانیستلو په برخه کې فشار راوړي.
سمیرا خموش یو له هغه مېرمنو ده چې د نجونو د ښوونځیو د بیا پرانیستې په کمپاین کې یې برخه اخیستې.
اغلې سمیرا وايي، په طالبانو د نړیوالو لهخوا د فشارونو په خاطر یې په دې کمپاین کې برخه اخیستې ده.
سمیرا خموش زیاتوي: "هېڅ یوه ډله د نجونو د تعلیم مخه نهشي نیولای، نجونې حق لري چې تعلیم وکړي او خپلې لوړې زدهکړې سر ته ورسوي، دغه ډله باید نجونو ته د تعلیم اجازه ورکړي تر څو د راتلونکي لپاره ښې مورګانې واوسي."
یاد کمپاین په بهرنیو هېوادونو کې د افغان مېرمنو ترمنځ زیات پراخ شوی.
په پاکستان کې مېشت افغان مېرمنه شهناز جسور وايي، طالبان له دې کار سره غواړي له نړۍ باج واخلي او دغه چاره د نجونو له راتلونکې سره سیاسي لوبه ده.
اغلې جسور له نړیوالې ټولنې او خلکو غواړي چې د بېعدالتۍ په وړاندې غلي پاتې نهشي.
شهناز جسور وايي: "زموږ هدف له دې کاره دا ده چې د نړۍ او خلکو پام دې برخې ته راوګرځوو، په طالبانو باید فشار راوړل شي ترڅو د ښوونځیو دروازې خلاصې کړي، زموږ یو نسل بېتعلیمه پاتې کېږي او دا زموږ راتلونکي لپاره یوه ستره ضربه ده، راځئ خپل غږ د دې ظلم په اړه پورته کړو، د دې لپاره چې زموږ یو نسل بېسواده پاتې کېږي."
له بلې خوا بیا د طالبانو د پوهنې وزارت وايي چې د مشرتابه لهخوا د امر وروسته به د نجونو ټول ښوونځي پرانیزي.
د دې وزارت ویاند عزیز احمد ریان په دې اړه ازادي راډيو ته وویل: "د شپږم نه تر ۱۲م ټولګي پورې د ښوونځیو د بیا پرانیستې لپاره د ځپلې رهبرۍ پرېکړې ته په تمه یو، هر کله چې هغوی امر وکړي د نجونو ښوونځي به پرانیستل شي."
طالبانو د روانې لمریزې میاشتې په دوهمه د نجونو په وړانډې د ټولو ښوونځیو د پرانیستلې خبره وکړه، خو په سبا یې د تعلیمي کال له پیل سره له شپږم ټولګي پورته ښځینه زدهکوونکو ته ښوونځي ته د ننوتلو اجازه ورنهکړه.
د طالبانو دغه کار په نړیواله کچه سخت غبرګونونو راوپارول.