فرانسه: ژمنه کوو چې عراق سره به کلک ولاړ یو

د فرانسې ولسمشر ایمانوئل مکرون د منځني ختیځ د امنیت په اړه د بغداد په سرمشریزه کې چې تر ډېره د افغانستان وضعیت پرې سیورۍ غوړولی و، ژمنه وکړه چې هېواد به یې له عراق سره کلک ولاړ وي. 


مکرون وویل، د اسلامي دولت ډله یا داعش چې یو وخت یې د عراق او سوریې د خاورې ډېره برخه لاندې کړې وه او په کابل هوایي ډګر یې د افغانستان لپاره د خراسان څانګې د وروستي خونړي برید اخیستي، تر اوسه یو ګواښ دی او باید پر وړاندې یې د څارنې هڅې کمزورې نه شي.


مکرون وویل، که امریکا خپل ځواکونه له عراقه وباسي، فرانسه چمتو ده چې دې هېواد ته د ترورېزم پر وړاندې د مبارزې لپاره ځواکونه واستوي.


د فرانسې ولسمشر د دغې سرمشریزې د پیل دمخه د عراق له صدراعظم مصطفی کاظمي سره کتلي و چې هغه هم فرانسه د ترورېزم پر وړاندې جګړه کې د خپل هېواد اساسي شریکه بللې وه. 


عراق هڅه کوي چې سیمه کې د کړکېچونو او د هېوادونو ترمنځ د اختلافاتو په هواري کې مهم رول ولوبوي. 


دې هېواد له دې مخکې د روان کال په لومړیو کې دې ته زمینه برابره کړې وه چې د سیمې دوه مهم سیالان، ایران او سعودي عربستان د مخامخ خبرو څو پړاونه ترسره کړي.