ګوادر کې د چينايانو پر ګاډي بريد: يو چينايي ژوبل
د ګوادر ډېپټي کمېشنر عبدالکبیر زرکون او د هغه ځای د پولیسو مشر اېس پي فرحان زاهد د اګست د ۲۰مې نېټې په شپه ناوخته خبریالانو ته وویل، د چینايي انجینیرانو یوه قافله بلوچ وارډ ته نېږدې پر نېشنل های وې د تېرېدو په حال کې وه چې برید پرې وشو. هغوی وايي، برید ځانمرګی معلومېږي خو په دې پېښه کې هېڅ کوم چینايي تن ته صدمه نه ده رسېدلې خو په برید کې وژل شوي ماشومان د پېښې پرمهال هلته د لوبېدو په حال کې ول چې دغه حمله وشوه.
هلته په اسلام اباد کې د چین سفارتخانې د اګست پر ۲۰مه په یو بیان کې ویلي چې په ګوادر کې ترسره شوي برید کې یو چینایي انجینیر هم ژوبل شوی دی. په بیان کې ویل شوي، دا ډول بریدونه د چین او پاکستان اړیکې نه شي خرابولای خو پاکستان ته پکار ده چې د چینايي انجینیریانو امنیت ته کلکه پاملرنه وکړي.
د چین سفارت پر خپلو اتباعو غږ کړی چې له احتیاط نه دې کار واخلي او بې له ضرورته دې بهر نه وځي.
چارواکو پر ټولنیزو رسنیو خپاره شوي هغه خبرونه رد کړل چې ګواکې دا ماشومان له پېښې وروسته د امنیتي چارواکو پر ډزو وژل شوي دي. په دې پېښه کې د وژل شویو ماشومانو عمرونه د۱۰ او ۱۱ کالو ترمنځ ښودل کېږي.
د ګوادر د پولیسو مشر فرحان زاهد د یوې پوښتنې په ځواب کې وویل، په برید کې چینايانو ته ځکه ځاني تاوان نه دی اوښتی چې پاکستاني امنیتي سرتېرو د هغوی ښه ساتنه کوله. پولیس وايي، له پېښې وروسته یې پلټنې پيل کړي خو تر دې دمه څوک نه دي نیول شوي.
بلوڅ ليبرېشن فرنټ په نوم وسله والې ډلې د ګوادر د چاودنې ذمه واري قبوله کړې ده. پر ټولنیزو رسنیو په خپور کړي بیان کې یادې ډلې ویلي چې په دغه برید کې یې ګڼو چینايي انجینیرانو ته هم مرګ ژوبله اړولې ده خو پاکستاني چارواکي دا ادعاوې ردوي.
تر دې وړاندې، د جولای پر ۱۴مه په بر کوهستان کې پر یوه بس کې چاودنه لږ تر لږه نهه چينايان او درې پاکستاني وګړي وژل شوي ول. دوی د داسو ډېم د برېښنا جوړونې پر پروژې کار کاوه. پاکستاني چارواکو ويلي چې د چينايي وګړو حفاظت ته یې پام دی او د پېښې پلټنې کوي.
د پاکستان د بهرنیو چارو وزیر شاه محمود قریشي هغه مهال ویلي و چې د بر کوهستان په داسو سیمه کې د چینايي کارکوونکو پر بس ترسره شوی برید ځانمرګی و او تور یې پورې کړی و چې په هغه حمله کې د هند او افغانستان د استخباراتي ادارو لاس وو.