موټر چلوونکي: چارواکي دې د خوست-کابل د لویې لارې امنیت خوندي کړي

په خوست کې د کابل او ګردېز اډې موټر چلونکي وایي، په هېواد کې د وروستیو جنګ جګړو د زیاتېدو له امله د دوی د موټرو سورلۍ هم کمې شوي او کاروبار یې اغېزمن شوی.


دوی وایي، په لویو لارو کې د جنګونو له امله یې وسایط په مرمیو لګېږي او ځینې وخت د موټرو چلوونکو او مسافرو ته هم زیان اوړي.


د کابل-ګردېز ا‌ډې ترڅنګ د موټرو د پرزو پلورولو یو تن هټیوال ۳۸ کلن جمشېد وایي، مشر ورور یې د خوست ـ کابل په لویه لاره موټر چلاوه او له دې لارې یې د خپلې کورنۍ لپاره حلاله روزي پیدا کوله.


جمشېد د خپل ورور په اړه وایي: "ورور مې د تېر شوي لوی اختر څو اوونۍ وړاندې، هغه مهال چې له کابله یې یو شمېر مسافر خوست ته روان کړي وو، د لوګر ولایت په محمد اغه ولسوالۍ کې د افغان حکومت او وسله  والو طالبانو ترمنځ په جګړه کې بند پاتې شو او د جنګ یوې مرمۍ ترې ژوند واخېست."


دی وایي، ورور یې واده کړی و او د دوه نارینه اولادونو تر څنګ اته لوڼې لري، خو د ګڼو نورو ارمانونو ترڅنګ یې د خپلو اولادونو د زده کړو ارمان له ځان سره یوړ.


د کابل او خوست تر منځ د همدې لویې لارې نور موټر چلوونکي هم په دې لاره کې له شته ناامنیو په تنګ شوي دي.


دوی وایي، هېواد کې د وروستیو جګړو د زیاتیدو له امله یې د موټر سورلۍ کمې شوي او د دوی ګټه یې هم اغېزمنه کړې ده.


د کابل خوست د لویې لارې یو موټر چلونکي همایون ازادي راډیو ته وویل: "زما خپله درې موټره دي، خو د جنګونو د لاسه اوس سورلۍ دومره کمې شوي چې په میاشت کې دا درې موټر شپېته زره افغانۍ هم نه جوړوي، که نه مخکې زما یوازې یو موټر سل زره افغانۍ جوړولې."




د لویو لارو د خوندیتوب لپاره چارواکي لا هم په ژمنو پسې ژمنې کوي، خو د موټر چلوونکو له خبرو داسې ښکاري چې ښکاره بدلون په کې نه دی راغلی.


په پکتیا کې د ۲۰۳ تندر قول اردو ویاند ایمل مومند وایي، د لویو لارو د امنیت خوندیتوب یې لومړیتوب دی: "فعلاً د کابل-ګردېز، خوست-ګردېز لاره په مکمل ډول د ترافیکو پرمخ خلاصه ده او تازه د قلعه سید حبیب الله په سیمه کې یو قوي بېز جوړ شوی دی او چېرته چې امنیتي ستونزې پېښیږي، ددې ستونزو د حل لپاره رهبري د بېزونو جوړولو پلانونه لري."


د خوست یو شمېر اوسیدونکي هم د کابل او خوست ترمنځ لویه لاره چې تر ډېره د لوګر ولایت په اړونده سیمو کې ناامنه ده، د امنیت له نه خوندیتوب یې اندېښمن دي او د لوګر پر ځایي امنیتي چارواکو غږ کوي چې د خوست، پکتیا او پکتیکا تر څنګ د یو شمېر نورو ولایتونو د اوسیدونکو د ډاډمن تګ راتګ لپاره دې، د دې لارې امنیت په ژمنو نه، بلکې په عمل کې خوندي کړي.